Na ka khana halor ka skul step ba hikai ei ïa ki Khynnah ba shem jynjar, ïoh pdiang khusnam ka nonghikai

Shillong, Jylliew 22 : Ka kam leh sbun kaba rit ka ai jingkyrmen ïa ka mynsiem ba don ka mon ban ïakhun kumta ym dei ban shu phohsniew hynrei dei ban da trei shitom ban ïoh ïa ka thong ka jingjop, ki la long ki kyntien symboh pyrkhat na ka Dr Amanda Pakynteiñ, Ph.D, ka nonghikai skul step ha Seiñ Jaiñtia Morning Secondary School, Shillong, kaba la ïoh pdiang ïa ka khusnam ‘Best Woman Guru Award’ na ka 4th International Inspirational Women Awards (IIWA) 2023 kaba la long myn ha ka 17 tarik u Jylliew ha Noida, Uttar Pradesh.
Kane ka lympung sam khusnam ka dei kaba la pynlong da ka GISR Foundation ban ai jingithuh bad ka burom napdeng ki kynthei ha ka Ri India baroh kawei bad sha bad shabar Rj kiba trei shit rhem bad aiti lut ïalade ha ka kam ba ki trei, ka jingtrei bha, ka jingdon sap kum ki nongwad bniah, ki riewshemphang ha ka pule puthi, ki nonglam lynti, ki nongai-jingmut, ki nongai jinghikai bad ki ‘riewtbit ha ka pyrkhat pyrdaiñ.
Ka Dr. Amanda, kaba dei ruh ka kurim u Bah Banteidor Lyngdoh, MLA na Mawkynrew Constituency, ka la ïoh pdiang ïa kane ka khusnam namar ka phang jingthoh lane ka ‘thesis’ halor ka ‘Khana bad jingkyntiew ïa ka rukom ai jinghikai skul ei sha ki khynnah kiba shah jynjar, kiba shah ban bein bad ki bym don lad’ da kaba kdew nuksa ïa ka skul kaba ma ka hi ka hikai kaba don Qualapaty.
Kane phang jingthoh ka dei ruh kaba la pynlong ïa ka Dr. Amanda ban ïoh pdiang ïa ka kyrdan Doctor of Philosophy (Ph.D) ha ka tnad pule na ka skul bah Mahatma Gandhi University, Meghalaya ha ka 27 tarik u Jymmang, 2022.
Kane ka skul la sdang ha u snem 2008 da ka Dr. Billiancy Lamare, ka ophisar ba la shongthait na ka tnad Education da ka jingmynjur ka Seiñ Jaiñtia ryngkat ka jingthmu ban ai ka jingshakri ei ïa ki khynnah pule ki ym ïoh lad, kiba shah ban bein bad kiba kyrshan dalade ïalade.
Kane ka skul ka la don haduh ka Class X hynrei ki nonghikai hangne ki hap ban ïa phiah lang ïa ka tulop SSA ba la mang na bynta tang lai ngut katba don pat kiwei ki nonghikai kum ka Dr Amanda bad katto katne ngut kiba shu hikai mon sngewbha khlem kano kano ka jingsiew eiei. Ki don ruh ki nonghikai kiba dang dei ruh ki samla pule kolej kiba don mynsiem ban hikai ha kane ka skul.
Ki don hapdeng 250-300 ngut ki khynnah ha kane ka skul bad ki longkmie kiba la kham heh rta ruh kiba dei na kiwei ki jaidbynriew kiba pule ha kane ka skul. Ki don lai ngut napdeng kum kine ki longkmie kiba thrang ban nang ban thoh kiba dang pule Class II bad ïaleh ïa ka eksam shiteng snem jong ki bad kiba angnud ban pyndep haduh ka Class X.
Kawei kaba ki nonghikai ki shem jingeh ka long ha ka ktien ka thylliej namar ha kane ka skul ki wan skul ki khynnah na ki jaidbynriew bapher bapher naduh ki snem ba la sdang ïa ka.
Haba ïakren bad ka Dr Biliancy Lamare, nongseng bad principal kane ka skul, ka la ong ba ka jingseng ïa kane ka skul ka long ban ïarap ban weng ïa ka jingpep skul shiteng por ki khynnah. Ka la ong ba ka jingmut kham ha shwa ka long ban buh tang kum ka Coaching Centre hynrei ynda plie ïa ka skul wat ha ka Class I ne Class II ruh ki wan pynrung skul bad ym banse ban sdang ïa ka skul.
Shuh ka la ong ba ka thong ka long ban ïa sam ïa ka jingnang jingstad sha ki bym don lad bad ki khynnah kiba hap ban kyrshan dalade ïalade kiba wan skul mynstep bad bylla pat mynsngi. Ka la ong ba wat hapdeng ki jingeh ki bun ki khynnah pule na kane ka skul kiba la kylla long ki nongshong shnong kiba don ka jingkitkhlieh ha ka imlang sahlang wat hapdeng ka jingbym don jingkyrmen shuh bad pass ruh ki kyrdan bapher bapher.