Na ka kam Rangbah Shnong sha ka jinglong MLA, MDC bad mynta kum u Myntri Sorkar

Nongpoh, Nailur 29: Namar ka jingkmen bad ka jingsarong bakhraw ïa u Bah Sosthenes Sohtun u ba dei u Rangbah Shnong barim ka shnong Lum Nongthymmai Byrnihat u la long mynta kum u MLA bad MDC ka Jirang Constituency bad u ba shah jied ruh kum u Myntri sorkar dang shen, ka dorbar shnong Lum Nongthymmai Byrnihat mynta ka sngi kala pynkup burom ïa u Bah Sosthenes Sohtun haka jingïalang kaba la long ha iing Dorbar katei ka shnong.
Naduh ki seng longkmie, seng samla ryngkat bad ka Dorbar Shnong kila ai ruh da ki jingai sngewbha sha u Bah Sosthenes Sohtun namar ka jingkmen halor ka lyngkor kaba u kit bad bah ïaka bynta ka shnong ka thaw ka constituency bad wat ka jylla baroh kawei, ba kum ki paidbah nongshong shnong naduh ki heprit haduh ki samla bad ki longkmie longkpa ki ieid bad burom.
Naka liang u Bah Sosthenes Sohtun da ka mynsiem ka jingieid bad ka jingkmen u la ai ka jingkhublei bad pynpaw ka jingsngewnguh kaba khraw ïaka Dorbar Shnong baroh kawei kaba la kynmaw burom ïa u bad kane ka long shisha ka burom namar ban ioh ka jingshaniah naduh iing, na shnong na thaw ka long kaba kongsan eh bad kum u nongmihkhmat ba ki paidbah kila jied bad pynjop u la kular ruh ban dang trei shitom ban trei bha naka bynta ka constituency bad ka jylla baroh kawei.
Ha katei ka sngi, ka jingpynkup burom ïa u Bah Sosthenes Sohtun, la sakhi ruh da ka jingdon u Bah Iaineh Wahlang, Rangbah Shnong Lum-Nongthymmai, u Bah Vigyan Kharkongor, President Seng Samla, ka Kong Eucivia Suting, President Seng Longkmie, ki riew rangbah lem bad ki paidbah nongshong shnong.