Nongpoh, Risaw, 28: Katba ka jingtalasi jong ki bor pulit ka Ri-Bhoi ka dang ïaid ha surok bah National Highway ha Nongpoh, 2 ngut ki briew bym pat lah ban ithuh ki la phet krad ïalade bad iehnoh ïa kawei ka kali Expresso kaba don ïa u number AS 01 EG 7234 hapdeng surok kaba la pynsuba sniew ïa ki pulit.
Ïa katei ka kali kaba dang thmu ban hiar sha Guwahati la ïoh bat noh da ki pulit ka Ri-Bhoi ha ka por kumba 12:40 baje eiei shiteng synñia bad ha ka jingtalasi shapoh la lap pynban ïa ki song Ganja shapoh katei ka kali katba 2 ngut kiba shong hapoh ki la phet krad noh ïalade bad shim kabu ïa ka jingdum jong ka miet.
Hadien ka jingtalasi na ka liang ki pulit ki la kurup noh ïa katei ka kali bad kitei ki song jingdih buaid bad mynta ka sngi ha ka jingdonlang ki nongsakhi la sei noh ïa kitei ki song Ganja na katei ka kali kiba don kumba 28 song bad ka jingkhia kumba 206.054 kilo.
Na ka liang ki pulit ki dang pynlong ka jingtohkit ban thwet ïa kitei ki 2 ngut ba phet krad na katei ka kali bad ruh ban leh katkum ki kyndon ka NDPS Act.
