Lyngïong, Ïaïong, 18: Ka jingjur jong ka ‘erïong ha kine ki khyndiat sngi ka la wanrah ïa ka jingjulor ki ïing ki sem ha kylleng sawdong. Ha ka shiteng synïa jong ka 17 tarik mynta u bnai ka ïing ka kong Ai-ieid Kharryngki ha ka shnong Thainthynroh, Lyngïong Lyngdohship hapoh ka Mawphlang C&RD Block ka la julor jur.
Ha kane ka jingjia ym shym la don satia kano kano ka jingmynsaw lait noh tang ka jingjulor ka ïing. Nalor katei ka ïing kaba lah kham julor, ki don sa katto katne kiwei ruh ki ïing kiba lah shah ktah.
Kum ka jingkyrshan bad ai mynsiem ïa ka shnong bad khamtam ïa katei ka longïing kaba la mad ïa katei ka jingshah pynjulor ha ka bor jong ka mariang, na ka liang u bah Staising Kharbteng uba dei u trai shnong ka thaiñ ha ka step jong ka 17 tarik hi ha ryngkat ki paralok ki la leit ban ïa kynduh ïa katei ka longïing ha ka jingdon ryngkat i bah Banraplang Kharbteng uba dei u Rang bah Shnong bad kiwei kiwei.
Na ka liang u bah Banraplang Kharbteng u la ïathuh ba kum ki nongpynïaid shnong tang shu ïoh jingtip halor ka jingpynjulor ka ‘erïong ïa ki katto katne ki ïing ki sem ha shnong ki la shimkhia ban wad ïa ki jingshah pynjulor bad shem ba ka ïing ka kong Ai-ieid Kharryngki ka lah kham julor jur.
Kumta halor kane ki la pyntip sha ki nongmih khmat ka thaiñ halor katei ka jingjia bad ruh sha kiwei kiwei ki ‘riew rangbah da kaba ai khublei ïa u bah Staising Kharbteng uba la wan ban ïadon ryngkat bad ka shnong khamtam bad katei ka longïing tang ha i por ba lyngkot ba ïoh jingtip halor kane ka jingjia.
Halor kane ka jingjia na ka liang ka shnong ka kyrpad ïa ki bor sorkar ban shimkhia ban ai ki lad jingïarap ba kyrkieh ïa katei ka longïing khnang ban yn lah ban maramot noh mardor.
