Na ka jingthmu ban pynkylla dustur ban ai jait kpa shah dawa hiar shuki u Bah Ardent ha u 2014, ong ka kong MDC Nongskhen

Shillong Rymphang 14: Ka MDC kaba la jop kumba lai samoi ka Nongskhen bad ka kyrtong ka NPP kong Grace Mary Kharpuri, ka la ïathuh ba u President ka VPP bad MLA ka Nongkrem Bah Ardent M Basaiawmoit ula shah dawa ban hiar shuki kum u Chief Executive Member (CEM) ka KHADC ha u snem 2014 namar ba u thmu ban pynkylla ïa ka dustur ban ai Jait Kpa.
Ka la ong, “Ha ka jingïalang ka Executive Committee (EC) u snem 2014, ka mat ban ai jait noh sha u Kpa la wan rah ban ïakren bad ngi baroh ki MDC ngi la kyntait ban pdiang namar ka kwah ban pynduh noh ïa ka dustur uba rim ba jah ban ai jait sha ka Kmie.”
Ia kane ka la ong ha ba ïalap elekshon ha dangshen. Ka ong ba kane ka mat ka dei ka bym lah ban pdiang da ki dkhot ka EC ha katei ka por bad kane ka la lam sha ka jingdawa ba u Bah Ardent un hiar shuki noh mardor haba bynrap ba kin (VPP) sa pyrshang biang ban wanrah ïa kane ka mat ban shim ïa ka Jait Kpa lada ki shah jied ban wan ha ka bor ha KHADC.
“Namar kata, kumno phin shaniah ïa ki (VPP) ban shim ïa kat kane ka kam ban synshar hapoh ka District Council haba ka jingthmu jong ki ka long ban pynduh jait noh ïa ka riti dustur ba riewspah jong ngi ka Jaidbynriew,” ong ka kong Grace.
Ka la kynthoh tyngeh ruh ïa ka VPP halor ka jingbyrngem ïa ki Dorbar Shnong bad da kaba ong, “Lashai lada ki wan ha ka bor, nga thikna ba khlem artatien kin thombor lut ïa baroh”.
Ka MDC ka la ñiew ruh ba u Bah Ardent uba kam ba ieid Jaidbynriew kum u khawpud namar dei ma u, uba nyngkong eh napdeng ki 8 ngut ki MDC, u ban iehnoh kam kum u MDC ba shep tieng ïa ka jingshah mait kyrteng kum u MLA hadien ba mynjur ïa ka aiñ bat arkam (dual post) da ka Sorkar Congress ba ïalam u Mukul Sangma.
Ka la ong, “Phi la ïohi mynta ïa ka rukom kren jong ki la kumba dei tang ma ki kiba tip lut ïa kiei kiei baroh hynrei nga kwah ban kylli ba kaei kaba pynlong ïa phi ban ngat ha ka jingriam jong ka Aiñ bala wanrah da u Mukul Sangma.”.
“Ka dei tang u Bah PN Syiem, u MDC ba mynta ka Mawkhar-Pynthorumkhrah, uba ïeng skhem ha ka nongrim bad ïatynjuh ïa kane ka aiñ hynrei kito kiba hylla ieid Jaidbynriew pat ki dei ma ki, kiba nyng kong eh ban iehnoh kam kum ki MDC. Kane kam dei mo kaba pyni ïa ka jinglong khawpud? ong ka kongGrace haba kyntu ïa ki paidbah ba kim dei ban shaniah ïa kum kine ki briew, kiba kwah tang ban don ha ka bor hynrei ki kynran dien na ki jingkitkhlieh ha ki khep kiba jynjar.
Haba kyntu ïa ki paidbah ba kim dei ban biej ha ki jingkynnoh bapher bapher jong ki Liang Pyrshah, ka kong Grace ka la ong “Peit ïa ki kam pynroi ba ai da ka NPP hapoh ka constituency. Kumta, nga kyrpad ïa phi ban ai ka jingkyrshan ba pura ïa nga bad nga kular ba ngan bteng ban ïa don ryngkat beit bad phi lada phi nang ailad ïa nga ban long biang ka MDC jong phi”.
Ha kaba iadei bad kane ka la ïaroh ruh ïa ka Sorkar NPP halor ka jingnud ban shim ïa ka rai ban pynbeit noh ïa ki kam ïakajia pud bad ka Assam. Hynriew tylli ki jaka napdeng ki 12 tylli kiba don hapdeng ka jingïakajia, la dep ban pynbeit haduh mynta.