Nongpoh, Risaw 30: Ki 2 ngut shi paralok ki la mysaw jur, hadien ba ki la hap sha riat na ka daw ka jingsyntuid kynsan ka scooty kaba ki shong katba ki dang hiar na Shillong sha Ri Bhoi.
Kane ka jingjia ka la jia ha miet jong ka sngi Baar ha ka por 10 baje ei ei mynmiet ha ki bytna jong ka surokbah ha Mawiong bad la ong ba katei ka Scooty kaba ym pat don number ka la syntuid kynsan bad ha kane ka jingsyntuid kynsan u nongniah scooty bad utei u nongshong ki la her na scooty bad hap syndon sha riat.
Katkum ka tyllong khubor ba la ioh lum, la ong ba ha kane ka jingjia, u dribar u la mysnaw jur na ka jingkdiah ka kjat bad utei uba shong nadien pat u la shu mynsaw malu mala wat la ki la hap baroh ar ngut sha riat.
La ong ruh ïa kane ka jingjia la lap da ki paidbah, kiba la ïarap ba tan da u tyllai ïa kitei ki ar ngut ba hap sha riat bad ki la pyntip ruh sha ka Ambulance 108 bad ruh sha ki Pulit ka Mawlai kiba la wan poi sha katei ka jaka bad ha kaba la pynkit noh ïa kine ki ar ngut ba mynsaw sha Civil Hospital Shillong ban ioh ïa ka jingsumar.
La ong ruh ïa kitei ki ar ngut la lah ban sei ruh na katei ka riat kaba ki la hap, ka dei da ka jingïarap ki paidbah kiba la tan da u tyllai bad dei haduh ba la lah ban sei ïa ki sha surok la ioh ban pynkit noh mardor sha civil hospital Shillong.
Shuh shuh, ka tyllong khubor ba la ioh lum la ong ba katei ka Scooty kam pat don satia ïa ka number bad ïa ka kyrteng jong kitei ki 2 ngut ruh ym pat ioh lum jingtip satia bad ba na ka liang ki pulit ka Mawlai ki dang pynlong ïa ka jingtohkit halor kane ka jingjia.
