Nongpoh, Nailur 24: U draibar jong kawei ka trok ryngkat u nongbud jong u, ki la mynsaw mynta ka janmiet, hadien ba katei ka trok ka la kylla ha ka surokbah National Highway-6 ha ki bynta jong ka shnong Shangbala, ha kaba la kynnoh ba ka daw ka jingkylla katei ka trok dei na ka jingpynher sted pat u la u nongñiah ba ñiah ïa katei ka Trok.
Katei ka trok ba la kylla ha ka surokbah ka dei kaba don ïa u number TR 05 E 1829 ka dang wan na Guwahati ban leit sha Shillong bad ba la ñiah da u Sujit Debnath (28) na ka shnong Komolachora, Tripura bad ryngkat ka jingdon lang u Nongbud ba la tip kyrteng kum u Sanjay Debnath (30) na Komolachora, Tripura kiba dang wan na Guwahati ban leit sha Tripura.Kane ka jingjia ka la jia, ruh ha ka jaka ba long khongdong ha Shangbangla, ha kaba la kynnoh ba ka dei na ka daw ka jingpynher sted palat u Nongñiah, uba ym lah shuh ban tehlakam ïa ka Kali, haduh ba ka la kylla ha ryngkat ka jingkit ïa ki kynja Machine.
Kumba la ioh lum jingtip, na ki Pulit, la ong ba na kane ka jingjia, baroh ar ngut kynthup naduh u Nongñiah bad u Nongbud ki la mynsaw, ha kaba la pynkit noh mar mar sha Civil Hospital Nongpoh ban ioh ïa ka jingsumar halor ka jingmynsaw jong ki, kaba la shah ktah na ka jingkylla katei ka Trok. Shuh shuh, la ong ruh ba ki Pulit ka Nongpoh ki la pynlong ruh ïa ka jingtohkit halor kane ka jingjia ban tip kham bniah ïa ka daw ka jingkylla katei ka Trok bad na ka liang ki Pulit hadien ba la dep ban tohkit ki la tan noh ïa katei ka Trok sha Thanad Nongpoh.
