Shillong, Ïaiong 01: Ka jingnoh synñiang u MLA ka Mawkynrew Constituency, Bah Banteidor Lyngdoh uba dei ruh u Myntri Sorkar Jylla ka la pynlong ïa ka Mary Queen of Peace UP & RCLP School, Laitkyrhong ban ïoh kamra klass na ka bynta ban pynïaid sha khmat ïa ka jingai jinghikai ïa ki khynnah ha ka kyrdan Upper Primary.
ïa kine ki kamra klass la mang tyngka na ka skhim SRWP kaba long 2 lak 50 hajar tyngka bad ym tang katta ki bor pynïaid skul ki la ai khublei ïa u MLA uba la noh synñiang sha ka skul ha ki por kiba la dep ruh kumjuh bad ki la khot ruh ïa u hi ban wan khap ribbon ha ka 31 tarik u Lber, 2022 kum ka dak ka jingplie ïa kine ki kamra kum u kongsan.
U MLA haba kren ha ka jingïalang u la kitbok kitrwiang ïa ka skul ba kan nang kiew sha khmat bad pynpaw ba ka long ka kaba sngewkmen ban tip ba ki la don haduh palat 200 ngut ki khynnah skul kiba pule ha kane ka skul. “Ka pyni ïa ka jingkiew sha khmat da ka jingïatreilang hapdeng ki kmie ki kpa, ki bor pynïaid skul bad nga kum u nongmihkhmat nga kyrshan ïa ka jingïatreilang”, u la ong.
U la ong ba kum ka motto jong ka skul kata ‘rise and shine’ kata hi ka dei ka thong ba ka jingnang jingstad kan pynmih ïa ki khynnah skul ki ban long ki samla ki ban kit pat ïa ka lawei bad pateng ban wan da ka jingkitkhlieh. Da kaba ai ka jingkular ba u buh thong ba ka pule puthi kan kiew ha ka Constituency, u la ong ba kum u nongmihkhmat un ïai ïatreilang bad ki bor pynïaid skul ban kyntiew ïa ki na ka bynta ka bit ka biang ki khynnah skul.
Kiwei kiba la ai jingkren ki kynthup ïa Fr Valerian Serroa, ki nongïalam shnong kumjuh na ka liang ki bor pynïaid kane ka skul. La pynshong shit ïa kane ka sngi da ki jingrwai jingshad bad ki drama na ka liang ki khynnah skul. Na ka liang ki bor pynïaid skul ki la ai khublei ïa u Bah Banteidor u ba ju ïatreilang bad ki na ka por sha ka por ha ki jingdonkam jong ki.
Ki la ong ba da ka jingnoh synñiang jong u ka skul ka la lah ban pynbiang ïa ki kamra klass na ka bynta ki khynnah pule ha ka kyrdan Upper Primary bad ka la wanrah ka jingkylluid bad kham suk ban ai jinghikai.
