(Tesar Marweiñ)
Nongstoiñ, Risaw 08: Naduh ba ki Kompeni pynmih tiar ki la sdang ban kamai lyngba ki online platform bad pynpoi ïa ki mar ki mata ha tyngkong ïing, ki ïew ki hat ha baroh kawei ka West Khasi hills District ki la hiar kynsan haduh ba bun bah ki nongshong dukan ki la sdang ban kynran dien noh.
Ha kine ki sngi bun ki nongkhaïi kiba ju leit sha ki ïew ki hat hapoh ka district kum ha Nongstoiñ, Riangdo, Rambrai, Sha;llang bad kiwei kiwei haba ïakren bad u nongthoh khubor, ki la ong ban ha ki snem ba mynshuwa ki mahajon kiba leit ban khaïi ban patengi kiba naduh ki thaiñ Mairang, Bynther, Kynshi bad kiwei kiwei ki hiar ban leit ïew bad ban khaï ban pateng ha Nongstoiñ, Rambrai haduh Riangdo bad man ka taïew ka sngi ïew heh bad sngi ïew rit ka shit ka shngaiñ, ka ïew Rambrai bad ïew Riangdo ruh kumjuh.
Hynrei naduh ba ki kompeni online ki la mih pyrthei wat kito kiba shong dukan man ka sngi ruh ki la shu shongkai, namar ki mar ki mata kim ïaid shuh bad ki nongshong shnong haba ki donkam ïa kino kino ki mar, ki la shu ïakut dor lyngba ki online platform bad ki kompeni ki la phah pynpoi beit ha tyngkong ïing.
Kawei pat ka daw kaba pynpjah ïa ki ïew ki hat ka dei namar ba haman la ki shnong ki surok ki la poi bad ki nongshong shnong ki la seng dukan haman la ki jaka bad pynbiang ruh ïa baroh ki jait mar bad ki tiar ba ki paitbah nongshong shnong ki don kam da kaba ïakut lypa ïa ki mahajon kiba don ïa ki kudam buh tiar kiba heh ba kin pynbiang kat kum ka jingdon kam jong ki paitbah nongshog shong.
Don pat ki mahajon kiba ong ba hato ka sorkar ka buh khajna ne em ïa ki kompeni online haba ki tiar ki tar bad ki mar ki mata kiba ïoh lyngba ka online ka dor ka kham tad shibun ban ïa kaba thied na ki dukan ïew.
Lada ka sorkar ka buh khajna bad ka Good Service tax ka trei kam ha kano pat ka rukom ki lah ban ïoh nong haba ïa ki tiar ba ki pah lyngba ka online kiba wan buh ki pynpoi haduh tyngkong ïng.
Don pat kiba ong ba imat ka jingai jingkheiñ jong ki kompeni kiba pynïaid ïa ki mar jong ki lyngba ka online ki dei kiba la shu ai thok bad ka sorkar ka la dei ban phah peit bniah bha halor katei ka mat lymda kumta kiba riewspah ki nang riewspah kiba duk ki la nang hiar arsut.
Kawei pat kaba ki nongshong dukan bad ki nongkhaï ki la pynpaw ka long ba lada ki paitbah nongshong shnong ki shanniah bad ïabeh palat ïa ki tiar online ki dei ban kynmaw ba ha kawei ka sngi kin sa shah shet kylla namar ha kane ka juk ba mynta palat marshiteng na ki kompeni online ki dei kiba thok suda bad haba ki la ïoh ban kamai da ki spah klur hangta kin sa shet kylla bad sahei phin wad ïa ki.
Ha kajuh ka por ki la ong ba ki paitbah ki dei ban peot nuksa ba haduh mynta tang lyngba ki Whataaps message bad mobile contact number lada bakla tiak ki account ha ki bank ki thylli khari khari hynrei ban wad ïa kiba kum kitei ki riew thoh riew shukor ka shem jingeh ban lap.
Nalor kata ki la ong ruh ba ka jingstad jong ki paitbah ka West Khasi hills haduh mynta kam pat kot wat tang shi saphit bad ka jingnang jingstad jong ki briew kiba na shabar ka jylla, kumta kim dei ban sngew sarong ban pynkiew ïa ka ïoh ka kot jong ki kompeni online.