Na ka jingkieng siej halor ka wahbah hap ïaid ki khynnah skul

Shillong, Lber 24 : Ka dawbah kaba ktah ïa ka pule puthi ha ki nongkyndong kam dei eh tang namar bym don ki iing skul ne bym biang nonghikai, hynrei kaba ktah tyngeh kadei ka jingbym biang ki lynti syngkien khamtam eh ha kito ki jaka ba ki khynnah skul ki hap ban ïaid lyngba ki wah heh kiba la shu teh da ki siej na shilliang sha shilliang.
Kawei na kum kitei ki jingjia kadei ha North Garo Hills kaba ki don haduh kumba phra tylli ki shnong kaba naduh ki nongleit iew, ki nongleit shim dawai bad haduh ki khynnah skul ki hap ban ïaid lyngba ka jingkieng ba la shu shna malu mala ha jrong ka wah Manda kaba don ha ka shnong Bugakol.
Kitei ki shnong ba ngat ha katei ka apot ki kynthup ïa ka Tombuna, Bugakol, Upper Sambrak, Lower Sambrak, Renggok Saram, Amerim, Rongmatchu bad Kentra, ki la ju ïai dawa man ka por naduh u snem 2018 na ki bor sorkar ban phah shna noh da ka jingkieng kaba skhem halor katei ka wah tangba ym don satia mano mano ba patiaw ïa ka jingkyrpad jong ki.
“Kaba kham pynkordit eh kadei ha ka por Lyiur ba ka wah ka khlain bor bha kumta kam long satia ban shngaiñ na kitei ki jingkieng siej ban leit sha Dainadubi lane sha Damra,” ong ki nongïalam shnong.
Ki la pynpaw ruh ba ha ka por lyiur bun ki khynnah skul naduh klas 1 haduh Degree ki kylla long ki sohpdung bad hap ban shu shong iing namar kam shngain satia ïa ki ban ïaid ha kitei ki jingkieng. Hynrei la ong pat ba da ka jingbym banse haba don ka eksam pat ki bapli ki hap ban ïaid la ka ïaid ban poi sha jaka pule.
Na ka liang ki nongïalam shnong ki kyrpad jur ïa ki bor sorkar sa shisien pat ba kan peit lem ïa katei ka khia ka shon jong ki bad ban phah shna noh da ka jingkieng dewbilat na shilliang sha shilliang khnang ba ka jingshngain kan ym dei eh tang ïa ki nongleit iew wan iew ne leit shim dawai hynrei na ka bynta ka lawei jong ki spahbad ki hajar ngut ki samla pule.