Jiribam, Naiwieng 17: Ka jylla Manipur ka la hap ban mad biang ïa ka jingïaumsnam kaba shyrkhei hadien ka jingshah rahbor bad ka jingjia ka jingshah pynïap jong ki 6 ngut ki riewpaidbah hapoh ka shnong Jiribam, kane ka jingjia ka la wanrah ruh ïa ka jingkynad kaba jur bad ki jingïakhih kiba jur.
U paidbhur uba la khie bitar na ki bynta bapher bapher jong ki district ki thombor ïa ki ïing jong ki nongïalam seng saiñ pyrthei ha kaba kane ka la wanrah ka jingjulor jong kiba bun ki jingdon jingem jong ki.
Katkum ki kaiphod, ki la don haduh 13 tylli ki ïing jong ki MLA kiba kynthup ruh ïa ka ïing u myntri ka sorkar, ki la shah pynjulor bad ki la shah thang ha ki nongïakhih ha kaba kane ka la jia ha ka 16 tarik mynta u bnai.
Napdeng kine, kidei ki ïing jong ki 9 ngut ki MLA jong ka BJP, kawei jong u MLA Congress, kawei jong u MLA ka JD(U) bad kawei jong u MLA ba shimet.
Haba kren sha ki lad pathai khubor na ka liang u Myntri Rangbah barim u Okram Ibobi Singh, u la ong ba u la kyntu ïa u Myntri Rangbah duh ka ri u Narendra Modi ban tuklar noh mardor halor kane ka jinglong jingman kaba la jia ha kane ka jylla. Na ka liang u Singh u la kynnoh lang ïa ka jylla bad ka sorkar pdeng ba kim lah ban pynneh ïa ka shongsuk shongsaiñ ha kum kane ka por.
“Kane ka jingjia kaba ngi la mad mynta ka la long sha lyndet jong ka jingngeit jong ngi, ha kaba wat ki khyllung ki longkmie ki la kylla long ki lanot. Kane ka jingjia ka la dei na ka daw ka jingpulom jong ka sorkar ha ka jylla bat wat ha ka sorkar pdeng ha kaba ïadei dei ban pynrem jur,” ong u Singh. U la banjur ba kum ka dak ka jingpynrem baroh ki MLA ki dei ban iehnoh kam.
Na ka liang jong u Singh u la kyntu ïa u Myntri Rangbah ka jylla u N. Biren Singh ban khot noh da ka jingïalang ban ïoh ïakren bad u Myntri Rangbah duh ka Ri u Modi. “Ngi la banjur manla ka por u la pynpaw ba u Myntri Rangbah duh ka ri u dei ban sngap ïa ki jingdonkam ki paidbah bad ba u dei ban khmih ïa ki jingeh kiba la jia ha Manipur. Lada kane ka ïaibteng kan pynbor ïa ngi ban shim ïa ki rai kiba khatduh. Kaei ka jingmut ban don hapoh ïingdorbar lada ym lah ban shakri ïa ka sur jong ki paidbah la ka long ha ka jylla ne ka sorkar pdeng?” kylli u Singh.
Na ka liang u Myntri Rangbah barim ka jylla u la pynpaw ruh ïa ka jinglong ba la kloi jong u ban iehnoh kam na ka bynta ka bha ka miat ki paidbah bad ban pynbeit ïa kane ka jingjia bad ban shim ruh ïa ki sienjam ban pynbeit ïa kine ki jingeh.
“Ngi don hangne ban mihkhmat ïa ki paidbah bad ïa ka bha ka miat jong ki, bad ka jingiehnoh kam khlem ka daw kaba biang kan long kum ka kam kaba ym don jingkitkhlieh. Lada ka jingiehnoh kam ka long kaba donkam na ka bynta ka bha ka miat bad ka suk ka saiñ, ngi la long kiba la khreh ha kano kano ka khyllipmat,” u la ong.
