Nongpoh, Risaw 24: Da ka jingïasoi Memorandum of Understanding (MoU) ka bor synshar District na Ri Bhoi bad ka Company Oil India Limited mynta ka sngi ha Conference Hall ka DRDA ha Nongpoh, kan sa long shisha ka jingmyntoi haduh 47 tylli ki skul ha Ri Bhoi ki ban sa ïoh pdiang ïa ki Paiñkhana kyrpang tang na ka bynta ki Khynnah Kynthei ba shen yn sa shna da ka Company Oil India Limited.
Kane ka jingïoh ki 47 tylli ki skul na Ri Bhoi ïa kitei ki Paiñkhana kyrpang eh na ka bynta ki khynnah Kynthei, ka dei ka jingshim khia jong u Mytri ka sorkar pdeng uba dang wan iuh kjat dang shen ha Ri Bhoi u Hardeep Singh Puri kum u myntri ka tnad Petroleum and Natural Gas, ba ki bor synshar District ki la buh ka jingkyrpad hakhmat jong u bad da ka jingshim khia jong u, u la bthah ïa ka Company Oil India Limited ba mynta ka sngi ki la ïa soi ïa ka MoU na ka bynta ban shna ïa kitei ki 47 tylli ki Paiñkhana ha ki skul ba la shah jied ha Ri Bhoi District.
Ha kane ka jingïasoi la don ryngkat naduh u Deputy Commissioner ka Ri Bhoi u Abhilash Baranwal, u Additional Deputy Commissioner ka Ri Bhoi u Raja Brahma bad na ka liang ka Oil India Limited la mihkhmat da u Arun Jyoti Baruah Chief General Manager, Human Resources, Oil India Limited ha ryngkat ka jingdo lang kiwei kiwei ki ophisar.
Haba kren sha ki lad pathai khubor, u Deputy Commissioner ka Ri Bhoi u Abhilash Baranwal, u la pynpaw ïa ka jingkmen ba lyngba u Myntri ka tnad Petroleum and Natural Gas ka sorkar pdeng u Hardeep Singh Puri, ki 47 tylli ki skul kin ïoh ïa kitei ki paiñkhana ba kyrpang bad kane ka la pynthikna ruh ba mynta ka sngi ïa la ïa soi ïa ka soskular hapeng ki bor synshar ka Ri Bhoi District bad ki nongmihkhmat na ka Oil India Limited.
U la ïathuh ruh ïa kane ka MoU ba la ïa soi hapeng ka ophis DRDA bad ka Company Oil India Limited, ka dei ka jingpynthikna ban tei ïa kitei ki 47 tylli ki Paiñkhana, ha kaba la jied kyrpang ïa ki skul kiba ym don paiñkhana na ka bynta ki khynnah kynthei bad kane ka paiñkhana ban sa shna ka dei kyrpang tang ïa ki khynnah kynthei.
U la ong ruh lyngba kane ka jingïasoh MoU lyngba ka Oil India Limited la mang pisa haduh T. 72 lak tyngka ban shna ïa kitei ki 47 tylli ki paiñkhana ha ki skul ba la jied da ki bor synshar District ha ryngkat ka jingïatrei lang ka Company Oil India Limited.
U deputy commissioner ka Ri Bhoi,u la pynpaw ïa ka jingsngewkmen ban ïoh ïa kane ka kabu ban shna haduh 47 tylli ki Paiñkhana ha ki skul ha Ri Bhoi bad kum u khliehduh ka Ri Bhoi District u la ai ka jingkhublei kaba kyrpang ïa u Myntri ka sorkar pdeng u Hardeep Singh Puri bad ruh ïa ka Company Oil India Limited, ba dei lyngba ka jingïatrei lang la lah ban mang pisa na ka bynta ban shna haduh 47 tylli ki Paiñkhana ha ki skul ba la shah jied ha Ri Bhoi District, u la bynrap.
