Shillong, Naitung 14: Kum ka dak na ka jingrakhe ïa ka Golden Jubilee ka RKM ka la pynlong ïa ka jingïakob ba ïadei bad ka Deiriti ba la pynlong da ka Ramakrishna Mission Shillong, la pynlong ruh ïa ka Youth Convention ha Ramakrishna Mission Vivekananda Cultural Centre.
Ha kane ka jingrakhe kumba arspah sanphew ngut ki khynnah pule bad ki nonghikai na kumba arphew ar tylli ki jaka pule bapher bapher ki la ïasoh bad kane ka prokram. Ka prokram ka la sdang ha ka por 9 baje mynstep bad ki khynnah pule ki la sdang wan ai kyrteng na ka bynta ka prokram naduh ka por 8 baje mynstep.
Ki khynnah pule kiba wan na ki jaka ba kham jngai kum na Sohra, Shella bad Sohbar ki la ïasoh lang ha kane ka prokram. U Swami Bodhmayanada, Adyaksha, Ramakrishna Mission Math and Mission, Hyderabad, Swami Hitakamananda, Secretary, Ramakrishna Mission, Shillong bad Swami Varananada, Principal RKM HS School, Sohra ki la ai mynsiem ïa ki khynnah lyngba ki jingkren jong ki.
Ki shiphew ngut ki nongkren ba la jied napdeng ki jaka pule ba ïashim bynta ki la kren halor ki phang bapher bapher ba la buh lypa na ka bynta jong ki. La pynlong ïa ka jingïamir jingmut hapdeng ki kynhun ha kaba ki la ïashim bynta shitrhem.
Ka bynta ba kongsan jong ka prokram ka long ka jingkren ai mynsiem jong u Sharad Vivek Sagar, CEO jong ka Dexterity Global. U la ïakren bad ki nongïashimbynta. Ka la don ka jingïalang ïamir jingmut bad ki resource person, bad ki khynnah pule ki la kylli jingkylli kiba don jingmut halor ki phang kum ka jinglah ban pynleit jingmut, ki jinglong nongïalam bad kiwei kiwei.
Ka prokram ka kynthup ruh ïa katto katne ki prokram deiriti kum ki jingrwai Khasi tynrai bad ki jingshad da ki khynnah pule jong ka Ramakrishna Mission Higher Secondary School, Sohbar bad Sohra, bad ka jingshad Wangla da ki khynnah pule jong ka Ramakrishna Mission Vivekananda Cultural Centre, Shillong.
