Shillong, K’ Lyngkot 17: Ka jingpynïaid bad thep lang ïa ki pipe um hapoh jong ka surok ka la wanrah bad pynjulor ïa ka surok na ka por sha ka por.
Ïa kane la lap da u nongthoh khubor ba ka surok kaba don hapdeng jong u Motphran, Shillong ka la julor mynta lah bun bun tylli ki bnai bad ba ka Tnat PWD Roads ka jylla kam pat lah satia ban maramot haduh mynta ne ba ka tnat PHE kan maramot ïa ki pipe um ba la thep hapoh kane ka surok.
Kane ka jingsniew bad khuid lut ka rong surok kadei namarba hapoh kane ka surok la pynïaid bad thep lang da ki pipe um bad namar ka jingpei jong ki pipe um ka la pynlong ïa kane ka surok ba kan kylla long thliew namar ka jingmih jong ka um shabar kane ka surok.
Kane ka jingsniew kane ka surok ha Motphran ka la wanrah ruh ka jingeh ïa ki kali kiba ap ïa ki nongleit nongwan ne passenger bad kumjuh ruh ki kali shimet kiba ïaid na kane ka surok manla ka Sngi.
Watla ïa ka Motphran la kynthup lang hapoh ka Smart City Project jong ka jylla hynrei ka jingbym maramot pat ïa kane ka surok ba la sniew lah bun bun bnai ka la wanrah ka jingleh raiñ ïa ka Nongbah Shillong, watla na kane ka surok shait ïaid ruh ki heh sorkar ne wat ki myntri Sorkar jylla.
Lah ruh ban ong ba surok ha Motphran kadei kawei na ki surok kaba long pdeng bha jong ka Nongbah Shillong, hynrei ka long pat kum kawei na ki surok kiba don shajngai na Nongbah naba ïa kane ka surok wat la ka don ka jingjulor haduh mynta ym pat shym la don kiba maramot satia.
