Na ka jingbthei bom dynamite ha Mynsangat kiew kiba ïap haduh 32 ngut bad 10 ngut kiba mynsaw

Khliehriat Rymphang 12: Katkum u kyrwoh khubor ba la phah da u Deputy Commissioner ka East Jaiñtia Hills District, u Manish Kumar, IAS la ong ba na ka jingjia kaba la jia myn ha ka 5 tarik mynta u bnai rymphang ha kaba ka la don ka jingbthei bom dynamite ha ki krem Dewïong ha Mynsngat ha ka thaiñ Thangsko East Jaiñtia Hills District, kiba la duh noh ïa ka jingim ki la kiew mynta sha ka 32 ngut bad ruh katkum ka kaiphot ba la ioh na ka tnat State Disaster Management Authority ka ong ba ki la don haduh 10 ngut kiba mynsaw.
U Deputy Commissioner u pyntip ruh ba ïa ka jingwad ïa ki briew ha krem Dewïong da ki kynhun pyllait im ba kynthup ka NDRF, SDRF, Special Rescue Team, ki pulit bad ki nongtrei kiba na ka District Administration la pynsangeh noh naduh ka por 5 baje janmiet jong ka 9 tarik u bnai rymphang.
Ki ar ngut kiwei pat kiba khlad ki dei kiba leit shah sumar mynta ha Agile Hospital, Beltola, Guwahati (Assam) bad u wei ba leit shah sumar ha NEIGRIHMS Hospital, Shillong, kumta baroh kiba khlad ki long 32 ngut haduh mynta.
Shuh shuh la ong ba ki bor district jong ka East Jaiñtia Hills District ki la phah ïa ki bor pulit sha ki par Dewïong beaiñ ha kaba la don haduh san tylli ki kynhun pulit ba don lang ruh lem bad ki Executive Magistrates, ki heh pulit bad ki heh sorkar kiba na ka tnat Directorate of Mineral Resources, ha kane ka jinghiar ki bor pahara hynnin ka sngi ka 10 tarik rymphang 2026 la ioh ban kurup haduh kumba 1020 MT u dewiong beaiñ na ka surok ban leit sha Sohkymphor, 2091.496 MT na shnong Sohkymphor bad na rud surok ban leit sha Byrwai, 227.78 MT na Sohkymphor Iu-rimkhliehshnong bad 1058 MT (Approx.) na rid surok ban leit sha shnong Byrwai bad Ladmynska.
Kumjuh ruh mynta ka sngi ka 11 tarik rymphang 2026, ki kynhun ki ioh ban kurup ruh 432.15 MT u Dewïong beaiñ na ka thaiñ Iapmala, halor kane ka jingkurup ia ki Dewïong beaiñ ki bor district ka la ujor da ka ejahar.