Na ka JHADC dawa ki paidbah jong ka shnong Mualsei ban weng noh ïa ka sanat waheh shnong jong u R.T.Kupa Thiaite

Khliehriat Nailur 6: Ki nongshong shnong jong ka shnong Mualsei kaba hap hapoh ka Saipung Sidarshi ki la pynpaw ka jingsngew khia halor ka jingbym hun jong ki ïa u R.K.Khupa ban long kum u Waheh Shnong, la ong ba kane ka jingjied Waheh Shnong ka dei kaba la shim bynta tang da ki khyndiat ngut eh ki nongshong shnong, la bun tylli ki shithi ki la buh ha ka Administraive Officer jong ka Jaiñtia Hills Autonomous District Council ha kaba ki la dawa na ka Council ba kan weng bad pyndam noh ïa ka sanat Waheh Shnong jong u R.K.Khupa Thiaite.
Katkum ka shithi ba la phah sha ka JHADC, ki nongshong shnong jong ka Mualsei, ki la kynnoh ba katei ka jingjied waheh shnong ka dei kaba khlem burom shuh ïa ki tymmen ki san kiba don hapoh shnong, kumjuh ruh katkum ka rukom jong ki Biate kim ju pynlong kano kano ka jingïalang ne ka dorbar ha ka sngi u Blei, la Ong ruh ba da ka jingailad u Deputy Commissioner ban pynlong ïa ka dorbar ha ka 6 tarik u lber 2021 da kaba bud pyrkhing ïa ki kyndon covid-19, pynban ki la shim kabu bad pynlong ïa ka dorbar ha kawei pat ka sngi kaba dei ka sngi u Blei bad kata ruh ki la pynlong ïa ka Dorbar jied waheh shnong khlem ka jingpyntip paidbah.
“Katkum ki kyndon lane section 23(2) jong ka JHADC Act 2015 la batai shai ba lada kam don kano kano ka jingjied waheh shnong ka ba khlem ia shim bynta da baroh ki paidbah, u Sirdar u dei ban shim ïa ka bor ban pynlong biang da kawei pat ka jingjied (election) da kaba shu thep vote ne da kaba phah rah kti, hynrei na ka liang u Sirdar u khlem shim khia ei ei ruh ban leh kumba la kdew ha ki kyndon aiñ jong ka JHADC” pynpaw ki paidbah bad kynnoh ruh ba ïa katei ka jinglong waheh shnong u R.T.Khupa la tip tang u Sirdar, ka ophis jong ka Saipung Sirdarshi bad ka ophis JHADC, katba ki paidbah pat ki dang khmih lynti ba ka JHADC kan tuklar lem halor kane.
La ong shuh shuh ruh ba hadien kane, utei uba kam ba u dei u Waheh Shnong, u la khot biang ban pynlong ïa ka Dorbar shnong ha la 29 tarik u nailar 2022 hynrei ka la mih pynban da ka huri hura, ka iashoh ïa dat hapoh shnong Mualsei, kumta ki nong shnong shnong ki la kyrpad biang ïa ka ophis jong ka Jaiñtia Hills Autonomous District Council ba kam shim khia ban tuklar lem ïa kane ka kam, namar ba ki paidbah ki don mynta hapdeng ka jingtieng bad jingsyier ïoh ba haleh, ha kano kano ka por kan mih biang ka jingia mynsaw ka ban lam sha kano kano ka jingjia ba sngewsih.
Ki la pynpaw ba ka jing dawa jong ki ban weng noh ïa ka sanad jong utei u waheh shnong uba shu kam hi, ka dei na ka daw ba ki kwah ban pynlong noh da kawei pat ka dorbar kaba khuid ba suba kaba ïa mon bad ïa mynjur lang da baroh ki paidbah nongshong shnong.
Haba kren sha ki pathai khubor, ki la ïathuh ruh ba kane ka jingbym mon ki paidbah ïa utei u Waheh Shnong ka la ktah shibun ïa ki paidbah ha kiba bun ki liang, kata naduh ki srynot shnong (Residential Certificate), ka ktah ruh ha kino kino ki lad ïoh jingmyntoi jong ki paidbah hapoh shnong.
Watla bun tylli ki shithi ki la phah sha ka JHADC, ki paidbah ki dang ap khmih lynti ba ka JHADC kan peit bad tuklar lem ha kaba ïadei bad kane ka kam waheh shnong ka ban long na ka bynta ka jingbit jingbiang ki paidbah.