Jowai, Naiwieng, 12: Ka Dorbar Ki Waheh Kur, Ri Jaiñtia, ha ka sngi Baar hapoh ka jingïalam u Bah K.L. Pariat bad u Bah G.H. Bareh ki la leit ban ïa kynduh u Executive Member ka Jaiñtia Hills Autonomous District Council (JHADC) u Bah Finelyness Bareh uba peit ïa ka tnat Political, na ka bynta ban kyrpad ïa u ha ka jingïadei ban ithuh bad ban thaw shwa ïa ka aiñ Kur ki seng Kur, kiba la dep ban pynrung ïa ki kyrteng seng kur katkum ka hukum ka Secretary EC JHADC ha ki lai bnai ba la dep.
Ka Dorbar Ki Waheh Kur, Ri Jaiñtia ka la kyntu ban phah ïa ki Kur kiba la dei ban ithuh lyngba ka aiñ jong ka JHADC sha ki Deputy Commissioner jong ka East bad West Jaiñtia District ba kin pynmih ne ai ïa ka Schedule Tribe (ST) Certificate tang ïa ki Kur kiba la ithuh da ka aiñ na ka JHADC.
Kumjuh ruh ka Dorbar Ki Waheh Kur, ka la kyntu ban pdiang pat ïa kiwei pat ki Kur kiba dang pynkhreh ban pynrung hadien.
U Bah Bareh, ula pdiang ïa kane ka jingkyrpad jong ka Dorbar Kur ha kaba u la pyntip ba un sa khot ïa ka jingïalang jong ka Dorbar ki Waheh Kur bad ka Political Department ka JHADC ha ki sngi ki ban dang wan hashwa ban kut noh ïa ka jingaipor ka Secretary EC JHADC ïa ki Kur ban pynrung haduh ka 30/11/2024, na ka bynta ban pynbeit bniah hashwa ban ithuh ka JHADC ïa ki Kur ki jait na ka kmie.
