Na ka jaka ba ju pynlong jingïakhih, kylla long jaka pynïeng kali ba bun kyrdan

Shillong, Rymphang 6: Ka jaka kaba ju pynlong jiingïakhih da kiba bun ki seng bhalang bad kumjuh ruh ki seng sain sain pyrthei kaba don ha hajan ka ophis jong ka Additional Secretariat, mynta kala long ka jaka ïeng kali kaba itynnad bha katkum ka juk stad mynta.
ïa kane ka jaka pynïeng kali la tip kum ka Automated Multilevel Car Park (AMLCP) bad kadei kaba nyngkong eh ban don hapoh jong ka jylla Meghalaya, ïa kane la tei ha ka jinglut kaba long 6.5 klur bad ki kali kiba lah ban rung ha kajuh ka por ka long haduh 60 tylli.
Kane ka project dei hapoh ka jingpeit jong ka tnad Urban Affairs ne ka tnad pynroi sor jong ka jylla, bad kane kadei ka project jong ka Shillong Smart City, ïa kane ka jaka pynïeng kali la wan ban plie hi da u Myntri Rangbah ka jylla u Conrad K Sangma nalor kiwei pat.
Haba kren ha ka jingïalang u Myntri Rangbah ka Jylla, u Conrad K Sangma, u la ong ba napdeng ki jingeh kiba bun kiba ka nongbah Shillong ka ïakynduh kawei na ki jingeh kaba khraw tam ka dei ka jingkhapngiah bad ka dheng kali ha ka nongbah.
“La thaw ïa ka buit treikam ka ban pynduna suki suki ïa ka jingkhapngiah ha ka sor bad ban weng ïa ki jingeh kaba lam pat sha ka jingeh ha ka leit ka wan bad kane ka jaka ïeng kali kaba bun kyrdan kaba ngi plie mynta ka sngi ka dei tang shi bynta jong ka jingpynbeit”, u la ong.
U Conrad u la pyntip ruh ba ki dang don sa kumba khyndai tylli ki jaka ieng kali ba bun kyrdan kiba dang don ha ka jingpynkhreh ki ban pynlong jaka ieng kali na ka bynta kumba 1300 tylli.
Ban thaw shuh shuh ki jaka ïeng kali u myntri rangbah u la pyntip ruh shaphang ka polisi ïeng kali ha kaba ki riew shimet kiba don jaka ki lah ban iatreilang bad ka sorkar ban shna ïa ki jaka ieng kali ha kaba u trai jaka u lah ban lum khajna na ka jaka ieng kali.
“La peit bniah ïa ki liang bapher bapher bad kawei na ki daw kaba pynlong ïa ka jingdheng kali ka long namar ba ki briew ki ïeng kali, kaba wanrah jingeh ?9a kiwei pat,” u la ong hynrei u la bynrap ba ïa ki paidbah hap ban ai ïa ki jaka ïeng kali ba la buh kyrpang ha kaba ki lah ban ïeng kali.
Shuh shuh u Myntri Rangbah u la ong, hadien ba la dep ban plie paidbah ïa kane ka jaka pynïeng kali ba bun kyrdan, ki pulit pyniaid kali kim dei shuh ban dang shah ïa ki briew ba kin pynïeng klumar ïa ki kali sharuh surok, hynrei ki dei ban phah thep beit ha kane ka jaka khnang ba ki paidbah kin ïoh ban ïaid kjat na kane ka jaka.