Na ka ïinglyntang hadien ba pluh, plie u Bah Sanbor ïa ka ïingthymmai u chowkidar ka skul RLSC

Shillong, K’Lyngkot 18: U Bah Sanbor Shullai uba dei u MLA ka 19 South Shillong ua dei ruh u Myntri Sorkar ha ka sngi Saitjain u la plie paidbah ïa ka ïing sah jong u chowkidar ka Raid Laban Secondary School, Shillong.
Kum ban shu kdew kane ka ïing sah u chowkidar jong kane ka skul kala pluh ding ha une u snem ba la dep, ha kaba na ka liang jong ki bor pynïaid jong ka skul kim banse ban hap pynsah ïa kane ka long ïing tang hapoh kawei na ki kamra kaba don ha kane ka skul.
Na ka liang u Bah Sanbor Shullai tang shu ioh jingtip halor kane ka jingjia mar mar u la mang noh na ka scheme MLA ïa kaba la tip kum ka SUWP jong u snem 2025, 26 bad 2027 ha ka jinglut kaba la kot 14 lak tyngka.
Ha kane ka sngi ba plie paidbah ïa kane ka ïing la ïa don lang ki nongkit kam shnong ba kynthup naduh u Rangbah Shnong bad kiwei kiwei de ha ka jingsakhi lang bad ki ophisar kiba la wan ban synran ïa u Bah Sanbor Shullai.
Haba kren lyngkot ha kane ka sngi ba plie bad aiti ïa kane ka ïing u Bah Sanbor u la ong, kane ka ïing lyntang snep kala kem ding na ka daw ba short circuit hynrei donbok ba ym don kiba mynsaw bad ka ding kala bam duh lut ploin ïa baroh ki tiar ki tar.
“Nga sngew ban ai nguh ïa u Rangbah Shnong bad Secretary Shnong bad ka Dorbar ba kila ïa pyrta shnong bad man la ka thliew ïing kila wan ban noh synniang lang,” ong u Bah Sanbor.