Na ka daw ka surok ‘High-Speed Corridor’ mih ka jingïakajia: Wahe Shnong Lahaleiñ
Ha ka 6 tarik ïaiong yn shong jingïalang ka EC
Jowai, Lber 31: Ki ar tylli ki shnong kiba don ha khappud bad ka Ri Bangladesh kata ka shnong Huroi bad ka Lahaleiñ kiba hap hapoh la Elaka Rymbai East Jaiñtia Hills District mynta ka sngi 31 tarik u Ïaïong kila wan hiar sha Jowai ban ïamih paidbah da kaba pynlong ka jingïaid rally kaba la sdang na Lad Stand War bad ïaid sha ophis ka Jaiñtia Hills Autonomous District Council (JHADC).
Kane ka jingïaid rally ka long shi bynta ban pyrshah jur ïa ka EC jong ka JHADC kaba la leh da ka bor ban ai Sanad ïa u Johny Suchen kum u Waheh Shnong ka Umpyrshin, khlem da ai jingtip shwa sha kitei ki ar shnong (Huroi & Lahaleiñ).
Ha shwa kane ka jingïaid rally la pynlong ka jingïalang ha Lad Stand War, kiba bun na ki nongkren ki la kynthoh jur ïa ka JHADC kaba la shim ïa kane ka rai ban ai sanad khlem ka jingpynsngew paidbah ne ka (Public Hearing). Shuh shuh ki la pynrem ïa ka EC jong ka JHADC bad kumjuh ïa ka party NPP.
Ynda poi ha khyrdop ka JHADC na ka liang ki bor pynïaid District naduh u Magistrate bad ki pulit kila ailad kumba 10 ngut ki nongïalam shnong ba hakhmat ban leit rung shapoh ka Council ban ïakren bad ki ophisar ka JHADC lyngba ka Secretary namar ka jingbym don u CEM bad kiwei dei ki EM.
Hadien ka jingïakren na ka liang u ma Raja L. Suchen uba dang shu shah jied kum u Waheh Shnong ka Huroi ula pyntip ba ki ophisar ka Council ki la ong ba kim lah ban shim ïa ka rai, kumta la buh por ha ka 6 tarik u Ïaïong, 2026 ba kin shong ïa ka EC bad ban thaw ïa ka Tribunal da ki Judge bad ban bishar ïa kane ka kam.
Halor kane kitei ki ar shnong ki la kyntu ïa ka Council ban kan pynkloi ïa kane ka kam, lym kumta kin sa shim ïa ki sienjam bad kino kino ki jingjia ka Council kan shim ka jingkitkhlieh. Ki la kynnoh ïa utei u Johny Suchen uba la kam ïa ki jaka hapoh jong kitei ki shnong.
Na ka liang u Waheh Shnong Lahaleiñ u ma Mit Dkhar ula pynsngew ka daw ba mih kane ka jingïa khajia, ka dei na ka daw ka jingwan ïa ka surok 4-lane High-Speed Corridor 166.80 km (NH-6) uba ïaid lyngba ka Lahalein – Huroi ter ter jong ki shnong kiba don ha khappud.
Shuh shuh ula ong ka jingwan jong kane ka surok bala bei pisa da ka sorkar kmie na Shillong shaduh Silchar kaba la kot da ki pher hajar klur tyngka bad kaba la pynmih mynta ïa kane ka jingkhajia ha kitei ki shnong.