Shillong, Risaw 12: Ka jingbym biang jong ki nala hapoh ka Nongbah Shillong ka la pynlong ïa kiba bun ki surok ba kin pei bad kylla long thliew bad ïa kane la sakhi da u nongthoh khubor ha kiba bun ki jaka jong ka nongbah Shillong.
Kawei na kine kadei ka surok kaba ha Mawkhar ha kaba la ïohi ba ki don ki surok kiba la shah pong thliew noh na ka daw jong ka jingbym biang jong ki nala ha kaba ka um slap ha kine ki sngi kiba la leit noh ka la ïoh ban kyllied bad pong noh ïa ki maw ba la siang hapoh ka surok na ka daw jong ka jingjur palat jong u slap.
La ïohi ruh ba ym tang hapoh ka shnong Mawkhar kaba la mad ïa kane ka jingeh hynrei ha kiba bun ki jaka ruh kumjuh ki la mad ïa kane ka juh ka jingeh ha kaba ïadei bad ka jingbym biang jong ki nala ha kaba ka la pynlong ïa ki surok ban jot rathai.
Na ka daw jong ka jingjot bad sniew jong kine ki surok ka la pynong ruh ïa kiba bun ki kali kiba ïaid na kine ki surok ban mad ïa ki jingeh da kaba ki hap ban ïaid kyllaiñ ban kiar na kine ki thliew surok bad kumjuh ruh ban lait na ka jingsniew jong ki kali jong ki ha ka por ba ki ïaid na kine ki surok.
Ha kaba ïadei bad kane la donkam ïa ki bor ba dei peit ban shim khia bad ba ha ka por ba ki ai contract dei ban don ka jingïakren ba ki briew kiba shna ïa ki surok ba ki dei ban shna pynbha ruh ïa ki nala khnang ba kan ym wanrah ka jingeh ïa ki nongleit nongwan kiba pyndonkam ïa kane ka surok.
