Na ka daw ka huri hura jaid bynriew ha Manipur haduh 58 ngut wan phet rieh ki Jaidbynriew Kuki ha Maikhuli

Nongpoh, Jylliew 17: Na ka daw ka jingmih ki huri hura bad ka jingïakynad jaid bynriew hapdeng ki jaid bynriew Meitei bad jaid bynriew Kuki ha ka jylla Manipur kaba dang bteng haduh kine ki sngi bad ban ioh jingïada ne ban shngaiñ ka jingim haduh 58 ngut ki jaid bynriew Kuki ki la wan ban phet rieh na Manipur sha Ri Bhoi District tang ban ioh rieh tngen shipor ha kane ka District namar ka jinglong jingman ha Manipur kaba la ktah ïa ka shongsuk shongsaiñ ki paidbah hapoh katei ka jylla.
Kumba la paw pyrthei, lyngba katei ka jingjia ha Manipur ka la pynrit mynsiem ïa kiba bun ki paidbah la ka dei na ka jaid bynriew Meitei ne Kuki, namar ka jingjur ka jingïakynad kiba bun ki la hap ban iehnoh ïa la ka ïing ka sem bad ki jingdon jingem shipor tang ban lait na ka jingma jong ka jingim ba ka jingïakynad kumba paw ka dang jur ha katei ka jylla Manipur.
Kumba la ioh lum jingtip da u Nongthoh Khubor u Mawphor na Ri Bhoi Distsrict. La ong ba ki jaid bynriew Kuki na Manipur ki la wan poi ruh wat ha Ri Bhoi District ban wan rieh tngen shipor bad kine ki jaid bynriew Kuki ki la wan poi sha ka Shnong Khappud ha Maikhubli ban wan sah shipor ba kuba haïing hasem tang na ka daw katei ka jinglong jingman ha Manipur.
La ïathuh ba tang ha ka Shnong Maikhuli ha ka thaiñ Pilangkata ha Ri Bhoi, ki la don haduh 58 ngut ki jaid bynriew Kuki kiba la wan ban riehtgnen shipor ha katei ka shnong bad kine ki jaid bynriew Kuki ki la wan poi ruh ha kine ki khyndiat sngi ban wan sah bad kiba haïing tang ban lait na ka jingma kaba ki la hap ban ieh ïa la ka ïing ka sem bad ki jingdon jingem ha ka jylla Manipur.
Haba wad jingtip halor kane ka jingwan poi kitei ki jaid byrniew Kuki ha katei ka shnong ha Ri Bhoi, ka tyllong khubor na ki Pulit ka Ri Bhoi, ka ïathuh ba kitei ki jaid bynriew Kuki shuwa ba kin wan riehtngen shipor ha katei ka shnong ki la wan pyntip shuwa sha ki bor Pulit bad wat sha ki bor shnong ryngkat kiba haïing hasem jong ki.
La ong ruh ba ki bor pulit ka Ri Bhoi ruh hadien ba la wan ban pyntip sha ki bor pulit ki la phikir bad peitngor ba kan nym don kano kano ka huri hura ha katei ka thaiñ bad kum ki bor pulit ruh kin dang peitngor halor kane ka jingwan riehtngen jong ki shipor ha katei ka shnong kaba ki donkam ïa ka jingïada ban shngaiñ ka jingim.
Shuh shuh, ka tyllong khubor Pulit na Ri Bhoi, ka ïathuh ba napdeng kitei ki 58 ngut kiba la wan sah bad kiba haïing hasem shipor ha katei ka shnong mynta ki la duna, namar la don ruh kiba la leit phet sha Delhi ban rieh tngen ïa lade kaba dei tang na ka daw ka jinglong jingman bad ka jingïakynad hapdeng ki jaid bynriew Meitei bad ki jaid bynriew Kuki ha ka jylla Manipur.