Na ka CMHAP ïoh tin sop ïing 400 tylli ki longïing ha Mawkyrwat bad Ranikor Constituency

Mawkyrwat, Lber 27: Ka long kaei kaei ka jingïarap bad jingmyntoi na ka bynta ki longïing ba duk ha kaba na ka Chief Minister’s Housing Assistance Programme (CMHAP) jong u snem 2023-24, ki 400 tylli ki longïing ki la ïoh jingïarap da ki tin sop ïing kiba tip kum ki ‘CGI Sheet’ ba la ïoh ban sam ïa ki ha ka jingïalang ba la long hapoh ka Hall jong u Block Development Officer (BDO), Mawkyrwat C&RD Block.
Ha kane ka sngi la dep ban sam ïa ki tin sop sha ki 400 tylli ki longïing kiba dei napoh ka Mawkyrwat bad Ranikor Constituency da u bah Renikton Lyngdoh Tongkhar uba dei u MLA jong ka Mawkyrwat Constituency ha ryngkat ka jingsakhi lang u bah I. Lawriniang uba dei u Block Development Officer (BDO) jong ka Mawkyrwat C&RD Block.
Haba kren ha ka jingïalang, u bah Renikton Lyngdoh Tongkhar u la ong ba lyngba ka jingsam ïa kine ki tin sop ïing kan long ka jingïarap na ka bynta ki longïing ba duk ki bym kot bor bad ym tang kata u don ruh ka jingkyrmen ba lyngba ka jingïatrei lang jong ki paidbah na ka mang jong ka sorkar bad da ka jingtrei shitom jong ki shimet shimet kan long ka jingmyntoi ïa ki ba kin lah ban tei ïa ki ïing kiba bha.
“Da ka jingdon ïa ki ïing ba khambha, nga khmih lynti ba nangne shakhmat, ki khubor pluh ding jong ki ïing ki sem kin duna da kaba ki briew kin long kiba phikri ha kum kine ki por ba don ka jingrang tyrkhong bad jur ka jingbeh ka lyer”, ong u bah Renikton.
Haba kren ha kaba ïa dei bad ka jingshon ïa u Aadhaar, u bah Renikton Lyngdoh Tongkhar u la ai ka jingkyntu ba ki paidbah kim dei ban shah ïalam bakla halor kane hynrei ki dei ban long ki briew kiba da wad bniah bad long kiba shlur ban shon ïa u Aadhaar khnang ba kin nym duh ïa ki lad jingïarap kiba wan na ka sorkar. Ym tang u la ai mynsiem ruh ba kin long ki briew kiba trei shitom ryngkat ka jingshlur ba kin leit tur ha ki ophis treikam bapher bapher jong ka sorkar ban kylli pyrthew ïa ki lad pynroi la ka long ha kaba ïa dei bad ki kam rep kam riang bad kiwei de ki lad jingïarap ba ka sorkar ka la dep ban mang kyrpang.
Lah ban kdew ba ïa kitei ki tin sop ïing la ïoh ban sam mar lai ban, na ka bynta kawei ka longïing ha ryngkat ka jingdonlang jong ki riew rangbah kata u babu Dominic Shangpliang uba dei u Chairman Block Housing Committee, u bah Jeslanroy Nongsiej, kiwei kiwei ki ‘riew Rangbah bad ki paidbah nongïoh jingïarap.