Na ka CEO leit dawa ka KYWM ban pynshitom ïa kiba leh pyrshah ïa ki kyndon ka NGT

Jowai, Ïaïong 12: Ka kynhun ïada ïa ka Wah Myntdu kaba la tip kum ka ‘Khooid Ya Ka Wah Myntdu’ mynta ka sngi kala leit ban ai syndon da ka jingthoh sha ka Additional Deputy Commissioner (ADC) ka West Jaiñtia Hills ka kong B. Blah kaba dei ruh ka Chief Executive Officer ka Jowai Municipal Board.
Katkum katei ka jingthoh ba la aiti la ong ba ka jingbteng jong ka jingpynjulor ïa ka Wah Myntdu da ka jingbret pathar ïa ki ñiut kan dang ïai bteng wat hadien ba ka NGT ba donburom kala dep ban pynmih ïa ka hukum jingmana, hynrei kiba bun hi kim shem la kohnguh ïa katei ka hukum.
Na ka liang ka Khooid Ya Ka Wah Myntdu kala dawa jur na ka CEO ka JMM ba kan shim khia ïa katei ka kam da kaba pynshitom tyngeh ïa kiba donkti, khnang ba kan long ka lad ban ïada ïa ka wah Myntdu kaba dei ka nongbsa umbam ïa ka sor Jowai.
Ha ka juh ka por ka KYWM kala ïoh ruh ban aiti sa kawei ka dorkhas ha ka CEO kata ban shan bha ïa ki nala um kiba lah ban ïada na ka jingtuid ki jakhlia sha ki bynta ka wah Myntdu bbad kumjuh ruh ïa ki lynti synkieng kiba dang hap hapoh ka jingpeit jong ka Jowai Municipal Board. Ula kyntu ruh ïa ki nongïalam jong ki Dorbar Shnong hashwa ban shna ïa ki nala um hapoh ki shnong jong ki, ki dei ban shna bha ïa ki nala katkum ki tender ba la ïoh.
Ha kaba ïadei bad ki ñiut kiba dang sahkut ha kylleng ka Ïawmusiang bad sha kiwei de ki jaka ka KYWM lyngba u President ka seng ma K.L Pariat ula buh ka jingkyntu ïa ka tnad Municipal ban kan wad ki lad ki lynti ban pynkhuid noh ïakitei ki ñuit, da kaba ong ruh ka katei ka tnad kadei ban pynlong ki prokram ai jinghikai ïa ki nongshong ïew bad ki paidbah nongshong shnong ba kim dei ban bre pathar ïa ki ñuit hynrei ki dei ruh ban nang ban pynbynta ïa ki ñiut.