Jowai, Ïaïong 13: Ka Synjuk ki Waheh Shnong, Jowai mynta ka sngi ha ka jingkren sha ki lad pathai khubor, la pynsngew ba ka Synjuk kala ai ka jingïaroh ïa ka ïingbishar ba don burom jong ka Meghalaya High Court kaba la pynmih ïa ka hukum halor ka Public Interest Litigation (PIL) No. 6/2022 kaba la bthat ïa ka tnad JHADC bad JMB ban leit kit ïa ki ñiut ba lumthup ha kylleng ka sor Jowai.
Ïa kane ka hukum la pynmih hynnin ka sngi 12 tarik u Ïaïong, 2022 hadien ka jingujor jong ka Synjuk ki Waheh Shnong, Jowai pyrshah ïa ka sorkar jylla, JHADC bad ka tnad Urban Affairs ha ka 7 tarik mynta u bnai bad ïa kane ka hukum yn shong bishar biang ha ka 20 tarik u Ïaïong 2022.
Ka Synjuk lyngba u President ma Alan Niangti ula ong kum ka synjuk kaba don ka jingkitkhlieh ‘ïaka khuid ka suba jong ka sor Jowai’, kila shim ïa kane ka rai ban ujor syndon sha ka High Court halor kane ka jingeh jong ki paidbah nongshnong shnong ka Jowai.
Ka Synjuk ka kyrmen skhem ba kane ka hukum ba la pynmih kan treikam noh mardor khang ba ki ñiut kin khuid noh na kitei ki jaka ba la lumthup shi jaka, ka Synjuk ka pynpaw ruh ka jingsngewnguh ïa ka Meghalaya High Court kaba la shim khia ïa kane ka jingeh jong ki paid ba bun ba lang.
Ka Synjuk ha ka juh ka por ka khot ïa ka jingïatreilang bad ki paidbah nongshong shnong ba kin ym bret pathar ïa ki ñuit kat shaba lap, namar ïa ka sor Jowai la ker talawiar ïa ka da ka Wah Myntdu kaba dei ka nongbsa umbam umdih.
Kum ban shu pynkymmaw u ma Niangti ula pynsngew naduh mynshem shnem ka Synjuk kala dep ban pynlong ïa ka jingïakhih da kaba ïaid rally pyrshah ïa katei ka jinglum thup ïa ki ñiut, ka jingkhot pakhang ïew kaba la ktah ïa ka ïoh ka kot jong ki nongshong ïew bad kumjuh ka jingpyntip sha ki bor ba halor naduh u MLA, u Myntri bad ki bor sorkar.
Kumta na ka liang ka Synjuk kam banse ban shim ïa kane ka kynti ban ujor noh sha ka ïing bishar ba don burom na ka bynta ka jingkhuid jingsuba jong ki paidbah nongshong shnong hi baroh kawei.
