Na ka bynta ka jingsuk ki paidbah, pyllait ka MSCPRC ïa ka website ba la pynbha thymmai

Shillong, Jylliew 28: Ka Meghalaya State Commission for Protection of Child Rights (MSCPRC), ha ka 24 tarik mynta u bnai, 2025, ka la pyllait ïa ka Website ba la pynbha thymmai jong ka Commission. Ïa kane ka website la pynbha thymmai na ka bynta ka jingsuk ban pyndonkam da ki paidbah bad ban ai ka jingpynsngewthuh paidbah shaphang ka Commission bad kumjuh ruh ban kyntiew ïa ka jingïadei hapdeng ka Commission bad ki paidbah ba bun.
Kane ka jingpyllait ka ïaid lang bad ka jingsoi ïa ka Memorandum of Understanding (MoU) na ka bynta ban thaw ïa ka portal ban lap ïa ki jingjia halor ki kam runar kiba long pyrshah ïa ki khynnah bad kiba la leh da ki khynnah kaba long katkum ka Juvenile Justice Act, 2005.
Ïa kane ka MoU la soi hapdeng ka Meghalaya State Commission for Protection of Child Rights bad ka National Informatics Centre (NIC), Meghalaya.
Ïa kane ka website ba la pynbha thymmai la plie da u Bah Paul Lyngdoh, Myntri ka tnat Social Welfare, ha ka jingïadonlang ka Agatha K Sangma, Chairperson ka Meghalaya Commission for Protection of Child Rights bad ka Kong Iamonlang M Syiem, Chairperson, Meghalaya Women’s Commission.
Ha kane ka prokram, U Myntri u la batai halor ka jingkiew ki kam runar pyrshah ïa ki khynnah bad da ki khynnah bad u la pynpaw ïa ki kam ba la leh da ka tnat pulit ban lap ïa ki kam runar khnang ban ïada ïa ki khynnah bad kumjuh ruh u la pynthikna ba ka sorkar jylla kan ai ka jingshimkhia ban pynthikna ba ïa ki hok jong ki khynnah yn dei ban ïada ha ka jylla.