Na ka 4.36 lak hectare ka jaka rep haduh 56 hajar hectare dei ba rep khlem dawai

Shillong, Rymphang 19 : U Myntri ka tnad ka Rep ka Riang ka sorkar jylla u Timothy D Shira u la pyntip ha Ïing Dorbar Thawain ka Jylla ba na ki 4,36,270 hectare ka jaka rep kumba 56,709 hectare kadei kaba la pyndonkam ban rep khlem dawai.
Haba jubab halor ka jingkylli ba wanrah da u MLA ka Mawphlang Bah Matthew Beyondstar Kurbah, u Myntri u la pyntip ba na kane haduh 26,948.413 hectare ki dei ki jaka rep ba la ïoh jingithuh ban rep khlem dawai.
Shuh shuh u Myntri haba jubab pat halor ka jingtreikam jong ka Kyiem fertilizer plant lane ka karkhana shna sboh dawai, u la ïathuh ba katei ka karkhana ka lah ban pynmih haduh 5 ton ha ka shisngi hynrei ka jingpynmih ka long beit katkum ka jingdon kiba kwah.
“Haba ym don ba kwah kam don satia kano kano ka jingpynmih,” u la ong.
Na ka liang u MLA u la pynpaw ba man ka por ba u hiar sha constituency u ju ïohi ba katei ka karkhana kam ju plie kumta halor kane ruh u myntri u ong ba lehse dei ba kam don kano kano ka jingdawa ba katei ka karkhana ka khlem treikam.
Hadien kane pat u Myntri Rangbah Conrad K Sangma haba bynrap lang u la ong ba ïa katei ka karkhana la pynïaid da ka IVCS bad ha u snem 2023 ka don ïa ka jinglah ban pynmih haduh 33,000 kilo ne 33 metric ton ki dawai sboh bad mynta ka don kumba 9000 kilo ha jaka buh.
Da kaba pynpaw ba ka don ka jingeh ha kaban pynmih ïa katei ka dawai sboh hynrei u ong ba ki don ka jingkyrmen bakin lah ban kyntiew ïa ka jingpynmih kham bun.