Na ka 385.71 klur ka Grant Sorkar Pdeng tang 129.63 klur lah ban pynbiang UC ki ADC

Shillong, Iaiong 09 : Ki Autonomous District Council (ADC) ki khlem lah ban aiti ïa ki Utilization Certificate (UC) ba pyntreikam ïa ki skhim bapher bapher ka Sorkar Pdeng, bala mang naduh u snem 2017 haduh u 2022.
Na ka song pisa ba la ai 385.71 klur tyngka kum ka Grant na ka sorkar pdeng naduh u snem 2017-2022, ki ADC ki la lah ban aiti ïa ki UC tang 129.63 klur tyngka (34%) na ka song bala ai, ong ka State Finances Audit Report jong ka Comptroller & Auditor General of India jong u snem ba kut haduh ka 31 tarik Lber, 2022.
Ka jingbym aiti ïa ki UC ka mut ba ki bor pynïaid kim shym la lah ban ai jingbatai ba kumno ki la pynlut ïa kane ka song pisa ha kine ki snem lane ki khlem pynlut satia, kala ong.
Ka CAG kala ai jingmut ba la ai ban bthah ïa ki ADC ba kin aiti noh ïa ki UC ba pynsahteng.
Ha kajuh ka por, ka kaiphod kala ong ba ka annual account jong ki ADC ki don ha ka arrear ba ar ne hynriew snem.
Ka Annual Account ba dang sah jong ka KHADC ka long naduh u 2020-21 haduh 2021-2022, JHADC ka long 2019-2020 haduh 2021-2022 bad ka GHADC ka long 2016-17 haduh 2021-2022.
Kat kum ka Fund rules jong ka JHADC bad GHADC, ka annual account la dei ban aiti sha ka PAG ( Audit) hashuwa ka 30 tarik Jylliew manla u snem hynrei kam shym la don satia ka jingkdew ha ka fund rules jong ka KHADC.