Shillong, Risaw 31: Ki nongïalam ka Village Defence Primary Committee Nongstoiñ Area (VDPCNA) ba hab hapoh West Khasi Hills ha ka sngi Palei ki la leit ban ïakynduh ïa ka kong Idashisha Nongrang, IAS, Director General of Police ka jylla haba ïadei bad ki mat ka jingshah khot hajir na ka por sha ka por, ban ithuh noh ïa ki da ka ba ai da ki uniform ban tehlakam ïa ki kam sniew hapoh ka shnong Nongstoiñ bad ka jingsahkut ka honararium naduh u snem 2010. Ha kaba ïadei bad kane haba kren sha ki lad pathai khubor na ka liang u Bah Mawkordor Syiemlieh President nyngkong u la ong bad ki shnong ki ba hap ha ka jingpeit jong ka Nongstoiñ Police Outpost ki don haduh 120 tylli bad na kine 37 tylli ki shnong kiba ïatreilang bad don ryngkat bad ka Nongstoiñ police outpost ban tehlakam ïa ki kam sniew bad ban pynduh jait ïa ki kam sniew hapoh ka thaiñ West Khasi Hills. Na ka liang jong u ula ong, “Ngi la trei borbah ban pynduh ïa ki jingsniew hapoh West Khasi Hills ngi ju ïatrei ryngkat bad ki VDP, ki sordar shnong bad ngi la ïoh ruh ïa ka khusnam na u SP barim ka West Khasi Hills u Bah H.G. Lyngdoh. Ngi ai khublei ïa ka tnat pulit kaba la ïatreilang ryngkat bad ngi la ka miet ka ïong ne ha kano kano ka por ba ngi donkam kum ka VDP kim ju kyntait”. Shuh shuh u la ong ba ka jingwan kynduh ïa ka DGP ka jylla ka dei halor ka jingduh mynsiem haba ïadei bad ka jingshah khot hajir na ka por sha ka por bad la duh mynsiem wat ban leit bylla ruh ym ïoh shuh bad na ka liang ka DGP ka la ong ba yn sa ïarap khnang ba yn lait na ka jingshah khot hajir ba bunsien. U la ong ba kawei pat kaba sngewtynnad eh ka dei halor ka uniform bad na ka liang ka DGP kan sa ai ïa ka uniform ban phong ha ka por ba leit duty sha baroh ki VDP hapoh West Khasi Hills khnang ba ka police department kan ithuh ïa ki VDP khnang ban kham suk ban ïatreilang ha ka por ba leit pyndep la ka kamram. “Kaba kham sngewtynnad eh kadei haba ïadei bad ka honorarium mynshwa ngi ïoh 300 tyngka ha ka shi bnai mynta ngin ïoh 3000 tyngka ha ka shi bnai. Ngi sngewkmen namar mynshwa naduh u snem 2010 haduh mynta ba bun kim ïoh shuh bad na ka liang jong ka Director general of police ka kong Idashisha Nongrang ka la kular ban ïakren ban pynlait noh ïa kine ki honararium. Ngi sngewtynnad ba ka kloi ban ïatreilang bad ki shnong khnang ban rat dyngkhong ïa ki kam sniew hapoh shnong hapoh thaw”. Na ka liang jong u, ula ong ba ka VDP manla ka por ba pyndep ia ki kam ram ka la ju shah byrngem ha ki briew kiba leh ia ki kam sniew bad dei halor kane ba la pynsngew ruh ha ka Director General of Police ba lada long dei ban seng noh da ka All Meghalaya VDP ban tehlakam ïa ki kam sniew ha baroh kawei ka jylla bad ïa kane la khmih lynti ba hapoh ka 2 ne 3 bnai ynsa lah ban thaw noh ïa ka jong baroh ki VDP.
