Na ka 25 lak, 2 lak tylli ki long ïing na Meghalaya ki la rung ha ka clean cooking mission

Shillong, Nohprah 17: Napdeng ki 25 lak tylli ki long ïing ha baroh kawei jong ka ri India, ki don kumba 2 lak ki long ïing ba thymmai na ka jylla Meghalaya kiba la rung ha ka clean cooking mission lyngba ka scheme Pradhan Mantri Ujjwala Yojana (PMUY) da kaba ioh ei ia ka jingioh tyndong lyer shet jingshet.
Ia kane la pyntip da u Parvin Bakshi uba dei u Commissioner bad Secretary jong ka tnad Food Civil Supplies and Consumer Affairs (FCS&CA) ha ka jingialang bad ki lad pathai khubor ia kaba la pynlong ha State Convention Hall, Shillong.
“Ha baroh kawei ka ri India ki don haduh 25 tylli ki long ïing kiba ioh pdiang thymmai ia ki tyndong lyer shet jingshet bad napoh ka jylla Meghalaya kiba ioh ia kane ka jingmyntoi kaba yn donkam ban siew pisa ki don haduh 2 lak tylli ki long ïing bad kine haba leit ban pyndap ia ki tyndong lyer ha ka sien ba nyngkong kim donkam ban siew namar ba ki ioh ei” ong u Bakshi.
Shuh shuh u la ong, haba ia nujor bad ka jingdon briew hapoh ka jylla ki briew kiba pyndonkam ia ki tyndong lyer shet jingshet ka dang duna bha, kumta u la kyntu ia ki nong shong shnong ba kin wan sha khmat namar ka shu donkam tang ia ki kot ki sla kum ka ration card, ka jingthoh na u Rangbah Shnong, ka bank account bad kumjuh ruh u phone number.
“Ka jingpyndonkam da kine ki tyndong lyer ne ka clean cooking mission ka don la ki bynta bad kata ka long ban ioh ia ka koit ka khiah namar ba kam don tdem bad kumjuh ruh ia ka khuid ka suba namar ba lada pyndonkam da ki tieng ban shet ka waneah ia ka jingbym khuid jingbym suba” u la ong.
Na ka liang u Amarjyoti Bordoloi uba dei u Chief General Manager (LPG) Indian Oil-AOD State Office u la ong hapoh ka jylla Meghalaya ki thliew ïing ki don haduh 7.5 lak tylli bad kiba pyndonkam ia ki tyndong lyer shet ki dang duna bha namar ki dang don tang kumba 3.28 lak tylli bad kane baroh kadei namar ba kim don satia ia ka jingshah pynsngewthuh ba janai bha halor ka jingpyndonkam ia kine ki tyndong lyer.
Ha ki thain nongkyndong ki bym pyndonkam ia ka LPG ne ki tyndong lyer shet ki don haduh 69 % bad ka long kaba donkam bha ia ka jingpynsngewthuh paidbah halor kane ka bynta.
Haba kylli ia ka daw jong ka jingduna, kila iathuh ba ka daw ba nyngkong eh kadei namar ba dang duna bha ha ka jingbun paid hapoh ka jylla, ka jingbym don ka jingpynsngewthuh paidbah bad kumjuh ruh sha ki thain nongkyndong kadei namar ka jinglong jong ka jaka kaba la buh ia ka jingeh ba khraw ia ki briew.
Shuh shuh kila pyntip ba ka jingduna kadei namar ba ki don ki briew ki bym shym la leh satia ia ka EKYC hynrei kila pyntip ba kin pyrshang ban kren ia kine ki briew ki ban ioh ia ka jingmyntoi ba kin leh noh ia ka EKYC.
Shuh shuh ki nongpyniaid kila kubur ba ki don ki briew kiba tieng ban shet da kine ki tyndong lyer, hynrei ka long kumjuh ruh ha ka por ba dang sdang shet da ka light da kaba ki ong ba tieng ioh shah bat light bad ing ki waiar, hynrei ki paidbah suki suki kin sa sngewthuh kumba la jia ha ka por ba dang sdang ka shet light.