Na Jorhat leit kem ïa ki Pulit ïa u riewbymman uba khyllied skad ïa ka khynnah skul

Shillong, Jymmang, 29: Tang hapoh lai sngi, ki Pulit ka Jylla ki la ïoh kem ïa uwei u riewbymman na ka jylla Assam uba donkti ban khyllied skad ban ïoh shondur khlemakor da ka mobile phone kaba la jia dang shen ha ka step sngi Thohdieng jong ka taiew baladep ha lynti ïaid kjat na Umsohsun, sha YMCA, Mawkhar, Shillong.
Ka kynhun ba kyrpang jong ki Pulit ba la thaw ha ka 26 tarik mynta u bnai hapoh ka jingïalam jong u Additional Superintendent of Police (Operation) East Khasi Hills u Bah Ivan B. Diengdoh ka la ithuh dur bad ïohkem ïa u riewbymman hadien ba ka video ba la ïoh ring dur na ka CCTV ka la saphriang ha ka Social Media ha kaba la ïohi ba uwei u briew uba la kah durkhmat u la khyllied ïa ka skad jong ka kawei ka khynnah skul bad shondur khlemakor da ka mobile phone jong u.
“Ka kynhun ba kyrpang tang hapoh lai sngi ka la ithuh ïa u nongleh kam bymman kum u Himan Gogoi (24 snem) na Jorbat, Assam bad ka kynhun ka la leit sha Jorhat ha ka 28 tarik mynta u bnai ha ka por mynstep. La pynlong ïa ka jingthwet lang bad ki Pulit ka Lahdoigarh Outpost ka Jorhat ha kaba la ïohkem ïa u riewbymman na ka iingsah jong ki bahaing jong u ha ka shnong Bamkukurachua kaba hap hapoh ka Jorhat Police station,” la ïathuh u Superintendent of Police ka East Khasi Hills Bah Vivek Syiem ha u kyrwoh ba la phah ha ka sngi Palei.
U la ïathuh ba ki Pulit ki la ïoh kurup ruh ïa ka mobile phone ba la pyndonkam da u nongleh kam bymman bad ïa kiwei kiwei ki sakhi satar.
Nalor kata la lap ba u Gogoi u dei ruh uba don case ha Teok Police Station.
“Ïa u nongleh kam bymman yn sa rah ban tian bishar ha District Court Jorhat bad ynda ïohbor yn sa wanrah ïa u sha Shillong ban rah tian bishar ha Kashari ha Shillong,” la ong u Bah Syiem.
Ïa ka lanot la ithuh bad ha ka jingtohkit la lap ba ka jingjia ka la jia ha ka por kumba 6.35 baje mynstep bad ki Pulit ki la ïoh pdiang ruh ïa ka ejahar bad register case ha Lumdiengjri Police Station, la ïathuh shuh shuh u Bah Syiem.
U la bynrap ba la ujor ruh sa kawei ka ejahar ha Sadar Police Station ha kaba kawei ka khynnah skul ka la ngat ha kajuh ka apot ha ka 19 tarik mynta u bnai hapdeng ka por 7.15 baje haduh 7.30 baje katba ka dang ïaid lynti na ki mawkyndon hajan Dreamland, Police Bazaar bad ïa kane ka case ruh ladep ban register.
Baroh ar tylli ki case la kheiñ kum ki Special Case Report da kaba pynshong nongrim ïa ka jinglong jingman jong ka jingjia, la ong u SP.