Na jingkieng hap u rangbah ha wah Iewsier katba dang shongkai bad ki paralok, ym pat lapdien satia

Nongpoh, Naitung 28: Uwei u rangbah naka shnong Umtasor Mawdkhar bala tip kyrteng kum u Bah EB Nongshli 47 snem ka rta u la hap na kawei ka jingkieng ha wah Iewsier katba u dang shongkai bad ki paralok haduh ba katei ka wah kala rong syndon ïa u namar ka jingheh jong ka um bad ym pat lapdien haduh mynta watla ki paralok bad ki briew shnong kila trei shitom ban wad bad ban lap ïa u.
Kane ka jingjia kala jia haka janmiet jong ka 27 tarik Naitung haka por kumba 7 baje eiei, katba u dang shongkai lem bad ki paralok, hynrei khlem poi pyrkhat utei u rangbah u la hap pynban sha wah haduh ba ym lapdien shuh.
Naka liang u Bah R Mukhim Rangbah Shnong ka shnong Umtasor Mawdkhar u la ïathuh ba kane ka jingjia kala jia haka por kumba 7 baje eiei janmiet bad tang hadien ka jingioh jingtip halor ka jingjah u tei u rangbah ha katei ka wah kum ka bor shnong kala pyntip mar mar sha ki pulit ka Nongpoh.
U la ïathuh ruh ba wat ki samla bad ki rangbah jong ka shnong kila pyrshang ban ngam sha katei ka wah baroh shimiet hynrei ym shym la lapdien satia bad dei mynta ka step kum ka shnong kala pyrshang ban leit wad biang ïa utei u rangbah hynrei ym pat lapdien satia haduh ban da thoh ïa kane ka khubor.
Ka Kong Phyrnai Nongshli para arkmie jong utei u rangbah kala ïathuh ba utei u rangbah u la mih naduh dangstep nala iing ban leit peit ïaka lyngkha, hynrei ynda janmiet la ioh pynban ka khubor ba u la hap ha katei ka wah bad jah syndon khlem lapdien shuh.
Na ka liang ki pulit bad ki bor shnong haduh mynta ki dang pynlong ka jingwad ban lapdien ïa utei u rangbah.