Shillong, Naitung, 05: Ki Pulit jong ka Madanryting Police Station ki la kem noh ïa uwei u briew uba la tip kyrteng kum u Weles Umsong, uba la 32 snem ka rta halor ka jingdonkti ban pynïap ïa u Bah Snar Kharkongor uba la 40 snem ka rta uba sah ha ka shnong Rasong.
U Kyrwoh ba la phah da u Superintendent of Police ka East Khasi Hills District u Bah Sylvester Nongtnger u la pyntip ba ha ka 13 tarik, Jylliew, 2022 ha ka por kumba 6 baje janmiet, ki Pulit jong ka Madanryting Police Station ki la ïoh jingtip ba la lap ïa ka metïap jong u Bah Snor Kharkongor ha kawei ka riat ba jylliew na ka jaka ba ju khot ka Mawriwar East, kaba dong ha ka shnong Pyngkya.
Ka kynhun ki Pulit ka Madanryting Police Station hapoh ka jingïalam jong u Sub Inspector Elias R. Marak ki la hiar sha ka jaka ba la lap ïa ka met ba la pyut jong u Bah Snor Kharkongor ha ka por 4 baje mynstep. Ha ka step 14 tarik, Jylliew, 2022 hadien ba la pyndep ïa ka jingtohkit la pynkit noh ïa kane ka met sha NEIGRIHMS Hospital na ka bynta ban leh ïa ka post mortem.
Shuh shuh u Superintendent of Police u la pyntip ba ha ka 22 tarik, Jylliew, 2022 ki bahaing hasem jong u Bah Snor Kharkongkor ki la mudui ejahar da kaba suba ba une u bahaing hasem jong ki, u la shah pynïap.
Ha kaba ïadei bad kane, ki Pulit jong ka Madanryting Police Station ki la rejister case ïa kane ka jingjia da kaba pynngat hapoh ka kyndon 302 jong ka Indian Penal Code. Ha ka jingtohkit kaba bniah, ki Pulit ki la lap dien ba dei u Weles Umsong uba phetrieh sha ka shnong Nongwar, kaba hap hapoh ka Sohra Civil Sub Division uba donkti ban pynïap ïa u Bah Snor Kharkongor.
Na ka met jong u Weles Umsong ki pulit ki la ïoh kurup ïa ka mobile phone jong u Bah Snor Kharkongor bad ha ka jingtohkit, u Weles u la phla ha ki pulit ba u dei uba donkit ban dkhat jubor ïa ka jingim jong u Bah Snor da kaba ksih na ryndang bad leit bret ïa ka met sha riat.
