Mawkyrwat, Jymmang 08: U President jong ka South West Khasi Hills District Swimming Association (SWKHDSA), u bah Stalyne H. Diengdoh uba dei u ophisar ba la shongthait kum u SDO jong ka Ranikor Civil Sub Division u la pynkynmaw, “ka jingpoi jong ki sha ka thong ha kano kano ka jingïaleh kam dei da lei lei ban long ka daw ban pynkiew sha ka jingsngewsarong, namar ka jingsarong ka wan ha shwa ka jingjot”.
Ïa kitei ki kyntien u la pynkynmaw ha ka jingïalang ba la pynlong ha phyllaw ïing jong u kaba long kum ka dak ban pdiang sngewbha ïa ki khun samla kiba leit ïa shimbynta ha ka jingïakop jngi (swimming) ha ka Meghalaya Games 2022 ha Nongbah Shillong ha ki tarik 2 haduh 7 u Jymmang, 2022 bad ha kaba na ka liang ki nongïakop jympa ruh ki la wan rah ka nam ka burom lyngba ka jingïoh jong ki ïa ki medal kata 15 tylli ki silver, bad 12 tylli ki bronze.
U President jong ka South West Khasi Hills District Swimming Association (SWKHDSA), u bah Stalyne H. Diengdoh haba bynrap ïa ka jingkren jong u u la pynpaw ka jingaikhublei kaba kyrpang na ka bynta baroh ki nongïashimbynta ha ka jingïakop jngi-um kiba la ïoh ban wan phai ryngkat ki khusnam bad kumjuh ruh ryngkat ki met kiba koit kiba khiah lyngba ka jingsumar sukher U Trai Kynrad na jrong. U la ong ruh ba ka jingjop jong ki ka la wanrah burom nyngkong ïa ki hi, ka ïing ka sem bad ka dong ka thaiñ baroh kawei bad da ka jingjop jong ki ka la long shisha ka jingsarong bad ka jingai mynsiem na ka bynta ki nongpynïaid jong ka association ba kin nanglah ban ïalam bad btin lynti na ka bynta ki khun samla ha ki jaid jingïalehkai bapher bapher.
Haba phai dien ïa ka jingkilanmet jong ki nongïa jympa ka long kaei kaei kaba sngewsih namar kim da don ka jaka kaba paka ba kin kilanmet, hynrei ki la shu ïa jngi kumba jngi ki nongap ap masi ha ki por kiba mynshwa kum ha ki pung ha ki wah kiba rit bad ki bym da long kiba bit shisha ba kin long ne kiba lah ban hikai ne train ïa lade ban mih khmat shabar na ka distrik. “Watla hapdeng kiba bun ki jingduna, hynrei da ka mynsiem jong ka jingtrei shitom, jingaiti lut bad jingkut jingmut jong ki ki la wanrah shisha ïa ka burom”, ong u bah Stalyne.
Ha kawei pat ka bynta, u la ong ba ka long kaei kaei kaba sngewsih ba ha ka jingkhot jong ka Mawkyrwat District Sports Association (MDSA) ban aikhublei kyrpang ha ryngkat ki nongmihkhmat na ka bynta ki nongïashimbynta ki ban sa mihkhmat ïa ka South West Khasi Hills District ha ka Meghalaya Games 2022, hynrei ïa ki nongïashimbynta ha ka jingïakop jngi pat kim shym la khot lang. “Kane kam pher hynrei kum ka association hi ha i bor i ba rit bad ha ka jingbymbit bym biang ki tiar ki tar, ki jaka jngi bad kiwei kiwei hynrei da ka jingkitkhia ryngkat ka jingtreishitom jong ki nongïashimbynta wat hapdeng jong ka jingduh jingkyrmen pynban ki la wanrah ka nam ka burom lyngba ki khusnam”, ong u bah Stalyne.
Kumta u la buh ka jingkyrpad lada long kaba lah nangne shakhmat ba haba don kum kine ki jait jingïalehkai ban leit mih khmat ïa ka distrik la i dei ban don lang kawei ka sngi ba baroh ki discipline ne ki jait jingïalehkai ki don ha ka juh ka jaka ba don ka jingaikhublei kyrpang kum ka dak ban kitbok kitrwiang, ym ban shu ïa leh la ka jong ka jong namar ka pynpaw beit ha ki briew kiba nabar.
Haba kren ha ka liang ka Badminton, ruh kum ka distrik kam da don ïa ki jaka kilanmet kiba paka hynrei ki don tang ar tylli ki Indoor kata ha Shnong Mawlangwir bad Shnong Mawkyrwat bad kine ruh kim pat da biang bha kumba long lem kiwei, watla kata ki nongïalehkai kim shym la kheiñ ïa kita baroh bad da ka mynsiem jong ka jingtrei shitom ki la mih bun ki samla shynrang bad kynthei kiba mih khmat ïa ka distrik ha ki bynta bapher bapher.
Namarkata, lyngba kane ka por u la buh ka jingkyrpad ïa ka sorkar lyngba ka tnad ka kam ïalehkai ba kan phai khmat lem sha ka South West Khasi Hills District ban pynbiang ïa ka jaka ban jngi ne ka swimming pool bad kumjuh ruh ïa ka jaka ïalehkai badminton khnang ba ki khun samla jong ka dong ka thaiñ kin nang lah ban hikai ne kilanmet ïa lade bad ba ka jingthmu jong ki ban poi sha ki kyrdan ba kham shalor kin ïai urlong da kaba kin pyndonkam hok ïa ka sap kaba ki ki don.
Ha kajuh ka por na ka liang u President jong ka SWKHDSA, u bah Stalyne H. Diengdoh u la ai khublei kyrpang ruh na ka bynta ki nongïashimbynta kiba la mihkhmat ïa ka distrik kiba la poi sha ka thong kum kawei na ki khynnah kynthei kaba la poi sha ka thong ha ka jingïakop ñiah ar shaka (cycle) ryngkat ka khusnam Gold Medal.
Ha kane ka sngi la ïoh ruh ka jingkren lyngkot na ki ar ngut ki nongjop kiba la wanrah burom ïa ka distrik kata ha ka jingïakop jngi-um bad kumjuh ruh ha ka jingïakop ñiah ar shaka (cycle) ha kaba na ka liang jong ki ki la pynpaw ka jingainguh nyngkong eh ïa U Blei U ba la ri la sumar bad ai bor ïa ki watla hapdeng jong ka jingtlot ha kiba bun ki liang, hynrei da ka jingdon ryngkat jong U Blei lem bad ka jingtrei shitom ki la ïoh kheit ïa u soh jong ka jingjop.
Ki la pynpaw ruh ka jingaikhublei ba kyrpang ruh na ka bynta ki nongïalam kiba shakhmat jong ki association ba lyngba ka jingaimynsiem jong ki ha ryngkat ka jingkyrshan jong ki kmie ki kpa, ki hynmen ki para ki la ïoh ban pyndep ïa la ka kamram ba la bynshet bad ïoh rah ruh ïa ki khusnam.
Ha kaba kut jong ka jingïalang, u President jong ka SWKHDSA, u bah Stalyne H. Diengdoh u la ai khublei kyrpang ruh na ka bynta ki para nongkitkam jong ka association kiba la ïadon bynta lang ha ka ban pdiang sngewbha bad ai mynsiem ïa baroh ki nongïashimbynta.
