Na i jingsdang iba rit, lada ym lah ban tehlakam naduh na la ïing tang kata la eh ban pynkylla: Bah Eson Eson

Mawkyrwat, ‘Nailar, 26: U bah Eson A. Khongrymmai, District Mission Manager, NRLM, South West Khasi Hills District uba long kum u kongsan ha ka Awareness Programme halor saw tylli ki mat, “Ka jingshongkha Khynnah”, “Ki jingsniew jong u Duma bad Sikret”, “Ki jingsniew ka kyiad bad u Drugs” bad “Ka Jingpynneh pynsah ïa ki dohum dohwah” ha shnong Mawkohphet, South West Khasi Hills District u la pynkynmaw, “Ki kam sniew ki ju sdang na i ba rit bad lada ym lah ban tehlakam naduh na la ïing tang kata la eh ban pynkylla”.
U bah Eson A. Khongrymmai, DMM, NRLM, South West Khasi Hills District haba bynrap ïa ka jingkren kum u kongsan u la ong ba ka jingpynlong ïa kane ka prokram long hadien ba ki Longkmie ryngkat ki VDPs ki la ïohi ba kiba bun ki kam sniew ki la sdang ban jia hapoh jong ka shnong bad ban dang suhthied da kaba pynpaw ba ki la long kiba la pynkhreh lypa ban ïeng tylli kawei ban ïaleh pyrshah. U la ong ruh ba kiei kiei kiba la dep jia ha kine ki sngi ki lah ban dei namar ka jingtlot ki jinghikai ha ki ïing ki sem.
Namarkata, u la buh ka jingkyrpad ïa ki paidbah nongshong shnong lban pynkhlaiñ ïa la ki longïing longsem ban kyndit bynriew noh bad kumno ban thaw ki lad ki lynti ban weng ïa ki jingeh kiba har rukom da kaba sdang shwa na ki ïing ki sem ki jong ngi. “Ka jingjyllei ha ka jingpyndonkam ïa ki jingdih pynbuaid kum ka kyiad, ka jingshongkha khynnah bad kiwei de kiba pynsniew ïa ka imlang ka sahlang bad lah ban dei na ka daw ka jingbun khun ha kaba ym lah shuh ban ai ki jinghikai kiba paka”. Shuh shuh u la ong namar na ka jingbun khun, ki kmie ki kpa haba kim lah shuh ban phah sha ki skul pule ki la phah noh ïa la ki khun ha karta kaba dang rit sha ki kam bylla sngi bad ynda haba ki khun ki la ïoh pisa lada dei lei lei ki khun kiba kham tam sneng ki sdang ban leh ïa ki kam sniew.
Kumta u la kyntu ba ka long kaba donkam ba ki SHGs ha ki shnong ki thaw kin long lem ki nongkyrshan bad nongïapeit nongiakhmih lem ïa ka khia ka shon jong ki longïing longsem, ym ban ïa kren tang ïa kiei kiei kiba ïa dei bad ka jingkyntiew ïa ka ïoh ka kot ne ka kamai kajih jong ki hynrei ban buh noh ka por la kumno kumno 20 minit ei ei ban kren bad ki khun ki kti lyngba ki jingsneng bad jinghikai ha ka lynti kaba dei khnang ba ka jingim jong ki khun ki kti kan long kaba bha lyngba ka jingphah pule ai ki kot ki sla, ki kam ïalehkai kiba bun jait bad ha kiba bun ki bynta khnang ba kan long mlen ïa ka jingim jong ki.
Ha ka jingkren jong u, u la pynkynmaw ba ki kmie ki kpa ha shnong Domjyrti ki la dep ban pynrung ïa ki khun jong ki ha ki SHGs bad lyngba kane ka lah ban long ka jingkyrmen ïa ka lawei kaba phyrnai jong ki khun namar haba ki don ha kum kine ki bynta kim don por shuh ban pyrkhat ïa kiei kiei ki bym myntoi namar ha kiba pynlong ki jingïalang ba bun jait ki pynlong ruh ki jingïarwai, ki jingïashad bad kiwei de ki prokram ki ban ïa tei iwei ia iwei pat bad da kata ka lynti ki khun ki kti jong ki ki lah ban lait na ki jingsniew kiba bun rukom.
Haba kren ha kaba ïa dei bad ki kam sniew kiba la sdang ban jyllei ha kine ki sngi, u la ong ba ka long kaba donkam ban tem ïa kum kine ki jingeh da kaba sdang ban hikai, ban sneng ban kraw shwa ha ki ïing ki sem, ha ki shnong ki thaw ryngkat ka jingïarap ki VDP namar lada synjor ne duna ki jinghikai bad ki jingsneng jingkraw ki khun ki kti ruh kin kylla jot.
Ha ka jingkren jong u, u la pyntip ba ka sorkar Meghalaya mynta ka dang pynkhreh ïa kawei na ka prokram ba kyrpang bad kata ka dei ka ‘Rescue Mission’ kaba dei ka bynta ban ïada na ka jingïap jong ki longkmie kiba kha khyllung bad ka jingïada na ka jingïap jong ki khyllung kiba hapoh ka 3 snem bad kane ka prokram mynta ka la sdang ban ïaid kylleng.
Kiwei pat ki nongkren ha kane ka sngi kiba long ruh kum ki Resources Person ki la kren ïa ki katto katne ki jingktah kiba ïa dei bad ka jingshongkha khynnah, ki jingsniew jong u duma bad sikret, ki jingsniew ka kyiad bad u drugs lada ki briew ki pyndonkam namar lada ki briew ki ïaid lait ne leh katkum ka jingkwah jong ki kin sa mat ïa shibun ki jingeh ha ka jingim jong ki bad ha ka jingshongkha ba dang khynnah lei lei kan ktah ïa ka met ka phat, lada ki pyrshang ban dih ïa ki jingmlien ba sniew hangta ruh ka lawei jong ki kan long kaba dum namar wei la pyrshang ban dih ki jingsniew ne ki jingma ki la ap lypa ïa ka jingim jong ki.
Shuh shuh ki la pynkynmaw ruh ba lada ki don kiba briew kiba ïaleh pyrshah, ka aiñ ka ban teh ban khum ïa kiba kum kita ki briew ka la don lypa. Namarkata, ban lait na kine kiei kiei ka long kaba donkam ba kum ki nongshong shnong ki dei ban don ka jingïatreilang bad ki nongtrei sorkar ha baroh ki liang da kaba kin sdang ruh ki jingsneng jingkraw na la ki ïing ki sem namar lada ymdon ka jingïatreilang ka long leh noh ei kane ka jingwan ai jinghikai ha ki shnong ki thaw.
Ki nongkren ki kynthup ïa ka kong W. Khonglah na ka District Social Welfare Department (DSWD) & One Stop Center (OSC), South West Khasi Hills District, u bah S. Passah, District Child Protection Officer (DCPO), South West Khasi Hills District, ka kong Banisha Snaitang, Psychiatric Nurse napoh ka District Mental & Health Programme (DM&HP), South West Khasi Hills District, ka kong N. Hahshah, Panel Lawyer, District Legal Services Authority (DLSA), South West Khasi Hills District, ka kon I. Khardewsaw, Childline Foundation, South West Khasi Hills District, u bah S.J. Kharbhih, Sub – Inspector jong ka Police Department South West Khasi Hills District.
Ïa katei ka prokram la pynïaid da ka Chilajong Village Organisation (VO) ha ryngkat ka jingïatreilang bad ka Village Defence Party (VDP) jong ka shnong Mawkohphet, South West Khasi Hills District lem ruh bad ka ophis jong u Block Development Officer, Mawkyrwat C&RD Block lyngba ka Block Mission Management Unit (BMMU), NRLM, Mawkyrwat C&RD Block, Kudumbashree NRO.
Ha kane ka sngi la pynïaid ïa ka jingïalang da u bah S. Iawphniaw uba long u Myntri Shnong Mawkohphet, ka jingkren pdiang na u bah Renolricky Iawphniaw, ka jingrwai kyrpang na ka Ïaid Shaphrang SHG bad ka jingkren ai khublei na ka kong B. Syiemlieh.