Nongpoh, Naiwieng 16: Kan dei ka sngi kaba pynkmen eh ïa ki paidbah ha Ri Bhoi Sepngi ha ka Distrik bad jylla hi baroh kawei bad kata ka dei ba hynnin ka sngi, u Narendra Modi, Myntri Rangbah duh ha ri, u la pynbna ba la buh ïa u Mawnongrim na bynta ban tei ka skul Eklavya Model Residential School (EMRS), ïa kaba yn sa tei ha ka jinglut kaba T. 64 klur, ïa kaba yn sa tei hapoh ka shnong Umsohbar, ka shnong khappud hapdeng ka Meghalaya bad Assam bad kaba hap ha Jirang Constituency.
Ban ïashimbynta halor katei ka jingbuh Mawnongrim u Modi ban plie ïa ki skul EMRS ha kylleng ki jylla kiba don ha ka ri bad ka jingïalang kaba la long ha ka jylla Gujarat, na ka liang u Bah Sosthenes Sohtun, uba dei u MLA Jirang bad uba dei ruh u Myntri ha ka sorkar jylla, hynnin ka sngi, ki la pynlong ïa ka prokram kaba kyrpang eh ha Jirang Block, kata ka long ban pynpaw ïa ka jingsngewkmen ba kaba kum katei ka skul yn sa ïoh ha Jirang Constituency bad ka ban sa ai jingmyntoi eh ïa ki paidbah, ym tang ha katei ka thaiñ, hynrei ha ka Distrik bad ha ka jylla hi baroh kawei.
Haba ïadei bad katei ka jingpynbna u Narandra Modi, ba la buh Mawnongrim na bynta ban tei ka skul skul EMRS ha Umsohbar, na ka liang u Bah Sosthenes Sohtun, kum u MLA Jirang bad kum u Myntri Sorkar, u la sngewnguh eh ïa ka sorkar pdeng hapoh ka jingïalam u Narendra Modi, nangta ïa ka sorkar jylla hapoh ka jingïalam u Conrad K. Sangma, namar ka jingurlong katei ka skul EMRS hapoh ka shnong Umsohbar.
Halor katei ka skul EMRS, u Bah Sosthenes Sohtun, u la ong ba na ka liang jong u kum u MLA, ha kine ki snem kiba la leit, u la dep phah jingthoh sha ka sorkar jylla bad hadien ba la ïoh ïa ka jingmynjur, ki la leit ban jurip ïa ka jaka kaba yn sa tei ïa katei ka skul EMRS.
Haba batai halor katei ka skul, u Bah Sosthenes Sohtun, u la ong ba katkum ka jingbthah da ka sorkar pdeng, ka long ba ka jingtei ïa baroh ki jingdonkam jong katei ka skul EMRS dei ban pyndep hapoh ki 36 bnai, ha kaba nalor ka skul Building, yn don sa ka jaka sah kaba la kajong na bynta ki khynnah shynrang bad kynthei, nangta kawei ka madan ïalehkai phutbol, u laiñ ban mareh, artylli ki madan ïalehkai Basketball, kawei ka madan Volleyball lem bad kiwei.
