Shillong, Nailur 16: U Nongïalam jong ka seng NPP bad uba dei ruh u Myntri ka Sorkar jylla u Rakkam A Sangma, ula ong ba ka elekshon shiteng samoi ( By-Election) ban wan ha Gambegre kan long hapdeng ka jingïakhun ka NPP bad ka Trinamool Congress (TMC).
Ha kaba ïadei bad kane haba ïakren bad ki nongthoh khubor ha ka sngi Nyngkong, u Sangma ula pynpaw ïa ka jingsngewskhem halor ka jingïoh jingkyrshan ka NPP, haba kren halor ka jingwan tuid jong ki nongshong shnong sha ki rynsan ïalap elekshon jong u.
“Ka elekshon hi ka dei ka elekshon, hynrei ïa kaba mynta kaei kaba paw ka long ba ka jingïakhun kan dei hapdeng ka NPP bad ka TMC, namar ki riewsaiñ pyrthei hi ki tip kaei ka ban jia,” ula kynthoh.
Haba kylli halor ka Congress khamtam ba ka Gambegre ka dei kaba la mihkhmat da u Nongïalam ka Congress u Saleng A Sangma uba la long MP Lok Sabha ka Tura, u Rakkam ula pynpaw ba kam don jingmut shuh kane. Ula ong ba da ka jingwan ïasoh ki laingut ki MLA ka Congress sha ka NPP, ka Congress ka la nang tlot bad kam dei shuh ka nongïakhun ha ka thaiñ khamtam ha kane ka elekshon ban wan.
“Ka Congress kam don lawei shuh bad da ka jingnang khlaiñ bor ka NPP, ngi kham lah ma ngi ban ïa kiwei ki party ban jop ha ka elekshon shiteng samoi ka Gambegre,” ong u Rakkam.
Na ka liang jong u ula kyntait ruh ba mynta ki kam pynroi ha kane ka constituency ki la wan na ka daw jong ka elekshon shiteng samoi.
