Na EKH yn sdang pyntreikam ïa ka kyndon ïalam Tourist Guide, lada seisoh yn leh lut ha baroh : Paul Lyngdoh
Shillong, Naitung 06 : U Myntri ka tnad Tourism jong ka sorkar jylla, Bah Paul Lyngdoh u la ïathuh ba ka sorkar jylla kan pyrshang shwa na East Khasi Hills ban pyntreikam ïa ki kyndon ba dei ban ïalam beit ïa ki nongialam lynti (Tourist Guide) na ka bynta ki nongjngohkai pyrthei kiba wan kai sha ka jylla.
Haba kren bad ki lad pathai khubor, u Myntri u la ong, “Nyngkong ngi la rai ba ngin pyrshang shwa ban pyntreikam ïa kine ki kyndon da kaba sdang shwa na East Khasi Hills.
Shuh shuh u Myntri u la ong ba ka jingbuh kyndon ba ki nongwan jngohkai pyrthei ban khot da ki nongïalam lynti ka long na ka bynta ka jingshngaiñ jong ki haba ki leit kai sha kino kino ki jaka jngohkai kiba don ha ka jylla.
U Myntri u la ïathuh ruh ba hadien ba ki la pyrshang shwa ar ne lai bnai ha East Khasi Hills, ka tnad kan sa shong ban bishar bniah ïa kane ka kam bad lada ka seisoh kin sa lah ban pyntreikam ha kiwei pat ki jaka jngohkai pyrthei kiba don kylleng ki bynta jong ka jylla.
Lah ruh ban pynkynmaw, ba ka Deputy Commissioner jong ka East Khasi Hills kaba dei ruh ka chairperson jong ka District Tourism Promotion Society (DTPS) ka East Khasi Hills District ka la kyntu ïa ki paidbah ba na ka bynta ka jingshngaiñ, ka long kaba kongsan ïa ki nongjngohkai ba kin ïalam lang ïa ki Tourist Guide haba ki leit Trekking ban lait na kino kino ki jingjia kiba sngewsih.
Kane ka sienjam ka la ïoh ruh ïa ka jingkyrshan ym tang na ki bor ba peit ïa ki jaka jngohkai pyrthei hynrei na baroh ki liang khamtam eh na ka synjuk jong ki nongpynïaid ïa ki jaka jngohkai pyrthei ha ka jylla.
Dang shen na ka liang ki bor sorkar ki la dep ruh ban bthah ïa ki nongwan kai ba kim dei ban leh shlur haba ki leit sha ki jaka jngohkai pyrthei khamtam ha kum kane ka por slap ba ki jaka ki btuid. La kyntu jur ruh ba kin dei ban ïalam da ki nongïalam lynti khnang ba kin poi da kaba suk bad shngain haba ki leit ha kino kino ki jaka bad kan ïarap ruh ïa ki ban lait na kaba bakla lynti.