Na Delhi ïoh pyllait ki Pulit ïa ka Khynnah ba shah rahbor na Tura kem bad pynngat POCSO ïa ki nongrahbor

Shillong, Risaw 27 : Ki Pulit ka West Garo Hills da ka jingïarap ki Pulit ka Delhi, kila ïoh ban pyllait im ïa kawei ka Khynnah kaba shah rahbor ha uwei u briew na Rajabala mynta la shisnem tam.
ïa kane ka khynnah la lap ha Delhi bad la wan ïalam biang ïa ka sha Tura, ka District Headquarter ka West Garo Hills, ha ka sngi U Blei.
ïa ka ejahar ba jah rngai kane ka khynnah, la ujor ha ka 20 tarik Risaw, 2024 da ki bahaïing hasem.
U Superintendent of Police (SP) ka West Garo Hills, Abraham T Sangma, ula ïathuh ba ki Pulit kila pyrshang ban wad ïa une u nongrahbor bad ïa ka khynnah la shisnem hynrei dei ha kine ki khyndiat sngi, ba kila ïoh ïa ka jingtip ba kane ka khynnah ka don ha Delhi.
“Ngi la pan ïa ka jingïarap ki Pulit ka Delhi bad kila ïarap ïa ngi ban lap ïa kane ka khynnah ha Delhi. Ngi la phah ïa ka kynhun ha ka sngi Thohdieng bad ha ka sngi Saitjain, ngi la shem ïa ki bad la wanrah biang ïa ki sha Tura hynnin ka sngi” ong u Sangma.
Haba nyngkong, ïa kane ka jingjia la register hapoh ka case rahbor pyrshah ïa une uba shah kynnoh hynrei hadien bala ïoh pyllait, la pynngat lang ïa u hapoh ka kyndon Protection of Children from Sexual Offences (POCSO) Act.
Une u Heh Pulit u pyntip ba ïa une u briew la ïalam tian bishar bad ka ïing bishar kala hukum ban set ïa u hapoh ka Judicial custody ba 14 sngi.
Ka khubor ka ïathuh ba kane ka Khynnah kala kha ïa I khun Kynthei ha Tura Civil Hospital ha ka step sngi U Blei.
ïa kane ka Khynnah la ïalam sha Delhi da uwei u briew ba kyrteng u Atowar Hussain ba ju khot sin u Rahul, uba dei na Rajabala, West Garo Hills.Ha katei ka por, ka dang dei tang ka khynnah.
Hadien shisnem, kane ka Khynnah kala ïoh phone ïa ki kmie kpa, bad pan jingïarap haba pynpaw ruh ba kala shah set ha Delhi hynrei kam tip pat ïa ka jaka.
Namar ka jingkhuslai, ki kmie kpa kila pan ïa ka jingïarap na ka seng ACHIK, kaba la shimkhia mar mar bad ïatreilang bad ki Pulit ka Tura Women Police.
Ha ka 21 tarik Risaw, ka kynhun ka ACHIK ha ryngkat ki bahaïing kane ka Khynnah, kila leit sha Delhi ban wad ïa kane ka khynnah. Hadien ka jingïawad katto katne sngi, kila pynthikna ba la set ïa ka ha Batla House, ka kyntoit kaba don ha South Delhi. ïa kane ka jingtip la phah mar mar sha ki Pulit ka Tura Women Police.
Ha ka 24 tarik Risaw, ka kynhun na ka Tura Women Police ha ryngkat ka jingïatreilang bad ki Pulit ka Delhi bad bala synran da ka kynhun Special Police Unit na ka Northeastern Region (SPUNER), kila pynlong ïa ka jingkhynra ha Batla House bad kila ïoh ban pyllait ïa kane ka khynnah bad ïoh kem ïa u Atowar Hussain.