Na Assam leit kem ki Pulit ka East Jaiñtia ïa u bar jylla uba pynïap ïa ka longkmie

Khliehriat, K’lyngkot, 30: Da ka jingtreishitom jong ki Pulit jong ka East Jaiñtia Hills District ha ka miet shiteng synñia sngi Balang ki la ïoh kem ïa uwei u snar pynïap briew uba donkti ban pynïap dusmon ïa ka Kong Nildres Dkhar, 60 snem ka rta na kaba sah ha Ladrymbai Dongwah.
Hadien ba la ïohkem ki Pulit ki la rah noh sha Ladrymbai Outpost ban pynlong ïa ka jingtohkit kaba bniah.
U runar uba donkti ban pynïap ïa ka longkmie u dei uba la tip kyrteng kum u Saidul Alom Barbhuiya,38 snem ka rta na ka shnong Septi Borjapur kaba hap hapoh ka Hailakandi Police Station, Hailakandi District, Assam.
Kum ban shu pynkynmaw, ïa ka met jong ka Kong Nildres Dkhar la lap da ki Pulit ha ka sngi Palei na ka iïng sah jong ka hi bad katkum ka jingïathuh jong ka khun ka Kong Nildres Dkhar dang ha ka 27 tarik mynta u bnai ha ka por 8.30 baje mynstep ka dang leit jngoh ïa ka khun jong ka ha Ladrymbai Datsimpeiñ bad ha ka por 6:00 baje janmiet pat ka la leitphai noh sha la ïing ha Ladrymbai Dongwah bad naduh ka por janmiet ka Kong Nildres Dkhar ka la jah bad kam shym la wan phai shuh sha la iing.
Hadien ba ki Pulit ki la ïoh jingtip halor kane ka jingjah ka kong Nildres Dkhar mar mar ki la pynlong ïa ka jingwad bniah bad ynda ki la leit sha ïingsah jong ka Kong Nildres Dkhar ki la lap ba ka ïing ka la khang tala.
Yna ki Pulit ki la pynpait ïa ka tala ba la khang na shabar ki la lap ba ka kong Nildres Dkhar ka la thiah ïap hapoh ïing ha kawei ka kamra.