Nongpoh, Nailar 14 : Hadien 3 sngi ba uwei u samla ba la tip kyrteng kum u Wanphrang Syiemlieh na Nongkyndang, Saiden ha Ri-Bhoi District u la kynthih sha Wah Umtrew ha Byrnihat hadien ka jingkthong jong ki paralok jong u bala kynnoh ba ka don ka jingbym hun haka rukom sam ïaka pisa kaba la ioh na kaba die ïaka mobile ba shu tuh, hynrei mynta ka sngi la lap noh ïaka met utei u samla kaba la per ha sla um sha ki thaiñ 14 mer haka shnong Morodola kaba hap haka jylla Assam naka jingrah jong ka um.
Ïa ka met jong utei u samla la lap da uwei u samla katba u dang kieng lieng ha katei ka wah mynta ka janmiet u ba la pyntip pat sha ki bahaiing jong utei u samla.
Kum ban shu pynkynmaw ba utei u samla u la kynthih nalor jingkieng ka wah Umtrew haka 12 tarik mynta u bnai haka por kumba 9 baje eiei mynstep bad naka liang ka kyhun SRT, Fire & Emergency Service ryngkat ki bor pulit kila pyrshang ban wad ïa utei u samla ha katei ka wah hynrei kim shym la lapdien satia.
Hadien bala lap ïaka met jong utei u samla, la pyntip noh mardor shaki pulit ka Byrnihat Police Outpost bad mar mar kila hiar sha katei ka jaka ban sei ïaka met jong utei u samla kaba la per ha sla um bad la pynkit noh sha Nongpoh Civil Hospital ban leh katkum ki kyndon jong ka aiñ shuwa ban aiti ïaka met sha ki bahaiing ban pyndep ïaka jinglehñiam ba khatduh.
