Shillong, Rymphang 17 : Ki la don haduh palat 900 ngut ki nongïalehkai ka jylla kiba ïoh jingmyntoi na ka jingkyrshan pisa ba ka sorkar jylla ka ai lyngba ka Chief Minister’s
Sports Scholarship Scheme, ong u Lat ka Jylla u CH Vijyashankar ha ka jingkren sdang jong ka Dorbar Mangtyngka hynin ka sngi.
“Tang na ka Chief Minister’s Sports Scholarship Scheme la sam palat 8 klur tam sha palat 900 ngut ki nongïalehkai ha kylleng ka jylla,” u la ong.
Shuh shuh u la ong ruh ba lyngba ka Meghalaya Outstanding Sportspersons Direct Appointment Policy 2025, ka la nang kyrshan shuh shuh ïa ka jingpynkup burom ai ki nongïalehkai kiba wanrah burom ïa ka jylla ha ki lympung ïalehkai National bad International da kaba ai kam sorkar ïa ki.
U Lat u la ong ruh ba ka rukom pynbeit mynta ïa ki kam ïalehkai la pynkhlain shuh shuh lyngba ki scholarship bad ruh ki khusnam pisa kaban pynshlur shuh shuh ïa ki nongïalehkai. U ong ruh ba lada khein kyllum ka jingpynlut na ka bynta ki polisi ban kyntiew ïa ki khun samla naduh u snem 2021-2022 ha ka jylla ka la poi mynta kumba 63.46 klur tyngka.
U Lat u la ong ruh ba man u snem ki la don palat 3,500 ngut ki khun samla kiba ju shim bynta ha ki lympung ïalehkai ba ju pynlong da ka sorkar bad ka Meghalaya ka la ïoh ruh ban pynlong haduh 14 tylli ki lympung ïalehkai kiba heh ha ka bad kumjuh jong ka pyrthei naduh u snem 2022 kynthup naduh ka Durand Cup, ISL bad kiwei ki lympung ïalehkai kiba heh ha ka ri kaba la pynlong ruh ïa ka jylla kum kawei na ki ktem ïalehkai ba paw ha ka Ri.
“Ngi pynshlur ruh ïa ki khun samla lyngba ka YESS Meghalaya, kaba kyrshan ïa kumba 1,500 tylli ki kynhun kiba la mih khmat da kumba 10,000 ngut ki dkhot da ka jingkyrshan pisa kaba kot 6 klur tyngka,” bynrap biang u Lat.
Shuh shuh u Lat u ong ruh ba ka Meghalaya ka la paw kum kawei na ki rynsan ïalehkai kaba paw ha ka Ri bad ha u snem 2027 kan sa ïoh ban pyhnlong ïa ka 39th National Games kaba kin don haduh 10,000 ngut ki nongïalehkai kynthup ïa ki nongïalehkai kiba la mihkhmat ha ki Olympic. “La dep mang palat 40 klur tyngka na kabynta ban pynkhreh ïa ka kynhun bad pynmih kam da ki spah tylli nalor kiwei kiwei ki lad ba thymmai.”
Nangta u ong ruh ba na ki 24,500 ngut ki nongïalehkai kiba la dep ban bishar la dep jied pat 400 ngut na ka bynta ba kin leit pyntbit khambha shuh shuh bad na kine ki don pat haduh 12 ngut ki nongïalehkai kiba kham kynsai kiba la pyntbit ha ka weightlifting bad ruh ha ka athletics ba kin lah ban aireng pat ha ka lympung National bad International.
“Ban kyrshan shuh shuh ïa kane ka jingpynkhreh, la tei ruh bun tylli ki jaka ïalehkai ha kylleng ki distrik ban pyntikna ïa ka jingdonkam jong ki nongïalehkai jongngi,” u la bynrap biang.
Nangta la ong ruh ba na ka bynta ban ïoh ïa ki jaka ïalehkai kiba paka, mynta ka sorkar ka la tei kumba 240 tylli ki jaka ïalehkai ha kylleng ki bynta jong ka jylla la ka long ha ki block bad haduh ki district. La ong ruh ba bun nakine ki jaka ïalehkai ki la treikam mynta.
U Lat u la ong ruh ba ki jaka ïalehkai kiba kham heh kum ka Mawkhanu Football
Stadium, la tei mynta ha ka jinglut kaba kot sha ka 732 klur tyngka kaban kyla long kawei na ki football stadium kaba heh tam ha ka ri ïa kaba la buh thong ban pyndep noh shwa u snem 2028.
