Nongstoiñ, Naiwieng 21: Ka Krishi Vigyan Kendra tnad treikam jong ka sorkar pdeng kaba peit bad khmih kumno ban kyntiew ïa ka rep ka riang ha ka ri baroh kawei, ka la ai jingmyntoi haduh katta katta ïa ki paitbah nongrep ha baroh ki jylla hapoh ka ri.
Ka jingdon jong ka tnad treikam jong ka KVK West Khasi Hills kaba don ha Nongshilong, kaba peit lang ruh ïa ka Eastern West Khasi Hills, wat la ka jingdon jong katei ka ophis ha katei ka jaka kam pat long pura. Hynrei naduh ba ka la sdang ban treikam da ki spah ngut ki nongrep ki la ïoh jingmyntoi lyngba ki skhim bapher ba pher kum ki skhim ri jingri, thung sohphlang, rep jhur rep soh bad ruh ki la ïoh jingmyntoi ruh na ki tiar kitar ban pyndonkam ha kaba lur ïa ki jaka rep, ki mashin ban pynkhuid ïa ki symbai bad kiwei kiwei.
Dang ha ka sngi Balang ba la dep, ka 19 tarik Naiwieng, katei ka ophis ka la pynlong ïa ka prokram ba kyrpang, kum ka jinglehkmen na ka bynta ka PM Kissan Samman Nidhi na ka bynta ban pynshai paitbah ha kaba ïadei bad ka rukom rep kaba pyndonkam da ka sboh shna hi kaba la ju tip kum ki natural farming.
Ha katei ka sngi u Bah Shakliar Warjri MLA ka Mawthadraishan Constituency u la long u kongsan. Kiwei pat kiba donlang ki long ki ophisar na ki tnad treikam ba kynthup ïa ka kong A. Nongbri District Agriculture Officer Eastern West Khasi Hills Mairang, ka Kong P. Ïawim District Agriculture Officer West Khasi Hills Nongstoiñ ki Asst DAO & HDOs jong ki ar tylli ki District ki la ïadonlang ryngkat bad shi spah hynñiewphew phra ngut ki nongrep kynthei bad shynrang kiba la wan ban ïashim bynta.
Ha katei ka sngi, ka dei ka sien kaba 21, ba ka ophis jong ka KVK ka la pyllait ïa ka skhim sha ki nongrep. Hadien ba la dep pynlait ïa katei ka skhim, la ïoh ruh ïa ka jingkylli bad ïatai hapdeng ki Saïantis jong ka ICAR Umïam bad ki paitbah nongrep, halor ka phang kumno ban kyntiew ïa ka rep ka riang bad ka ïoh ka kot jong ki nongrep.
