Nongstoiñ, Jylliew, 10: Ha ka sngi ba ar ka Auxilium Roilang Skills Training Centre Pyndengrei, ka la ïoh ban sam ïa ki syrnod sha ki samla kiba la ïoh ban pyndep ïa ki jingshah hikai ha ki kam suhjaiñ lyngba katei ka Shlem ai jinghikai.
Kiba la pass ïa katei ka Training ki kynthup ïa ki 60 ngut bad ïa katei ka Shlem la khmih da ka Auxiluim Skills Training Centre Khapmara Umroi, hapoh ka jingbei tyngka da ka Meghalaya State Skills Development Society (MSSDS).
Ki samla kiba la ïoh jinghikai lyngba katei ka Shlem, ki la pynpaw ka jingsngew nguh ïa ka sorkar kaba la plie lad, plie lynti kum kane ka jaka. Ki la ong ba ka jingdon jong katei ka Shlem, ka la ai jingmyntoi shibun ïa ki, khamtam eh na ka bynta kiba la pep skul noh shipor. Da ka jingnang ban trei ïa ka kam suhjaiñ ki la lah ruh kumno ban kamai ja kpoh da kaba ïeng ha ki kjat, la pynpaw da ka Lisa Mary Nongkseh.
Ha kane ka prokram la don lang ka kong N.E.Wanñiang MCS Assistant Commissioner West Khasi Hillls kum ka kongsan, ha ryngkat ka jingïadonlang u bah Leeford Lyngkhoi Skills Development Officer, Sister Jubil Mary Dkhar Director of Auxiluim Skills Training Centre Khapmara, Sister Patricia Nongkhlaw Centre Manager ARSTC Pyndengrei Nongstoiñ bad kiwei kiwei ki Sister.
