Nongstoiñ, Jylliew, 10: Ka jingleit pynshai paitbah jong ka ophis Krishi Vigyan Kendra West Khasi Hills sha ki paitbah nongrep, ha kaba ïadei bad ka jingpyntreikam jong ka sorkar pdeng ïa ka skhim ba kyrpang na ka bynta ki nongrep, kaba la tip kum ka Viksit Krishi Sankalp Abhiyan ka dang bteng ha kylleng ki shnong ha Eastern West bad West Khasi Hills.
Ha ka lah sngi u Blei ka 9 tarik Jylliew ki nongtrei jong ka KVK Nongshilong kiba la phiah ha la ki jong ki jong ki kynhun, ki la hiar sha bun tylli ki shnong kum ha Nongstoiñ, Mawlangdep Kynshimawria, Kynshi Bangla, Mawlangren bad kiwei kiwei ki shnong na ka bynta ban pynshai ïa ka rukom rep ba thymmai.
Ka jingpynshai kaba kongsan ka dei lyngba ka jingpyndonkam da ki mashin, ban rep ruh ïa ki jait jingthung kiba ai jingmyntoi ym tang ha kaba pynïaid ïew ïa ki, hynrei kaba ai jingmyntoi ruh lada bam namar ba ki dei ki jait jingthung kiba tei ïa ka jingkoit jingkhiah.
Ha ka jingleit ban pynshai jong ki nongtrei ka KVK ha ka shnong Kynshi Bangla bad Kynshimawria, ki paitbah nongrep ka la long kaba jop namar ba ki nongrep ki la shimkhia bad ïamih ryntih ban sngap bad shah skhor ïa ki jingai jingmut jong ki nongtrei ka ophis KVK.
Ha kitei ki jingpynshai ki nongtrei jong ka KVK ki la pynshai ruh ba ka kam rep ka kynthup ruh ïa ka kam ri jingri kum ki sniang, ki syiar, ri dohkha, ri ngap bad kiwei kiwei bad lada ki nongrep ki kwah ban ïoh ïa ki lad jingïarap na ka sorkar kiba dei bad ki kam rep jong ki.
Ki dei ban don ïa ki farmer ID kiba la ithuh da ka sorkar pdeng bad ki hap ruh ban aplai ïa ka PM KISSAN, da kaba pynbiang ïa ki dur thep vote, Adhaar card, passport size jong ki bad lada ki shem jingeh ban aplai ki lah ban wan mih sha ka ophis jong ka KVK ha Nongshilong ba kan ïarap ïa ki. Ha katei ka sngi la sam ruh ïa ki symbai sha ki nongrep kiba la wan sha ka jingïalang.
