Mynthi ki trai karkhana ïa ka bai kit mar ba pynmih ka Sorkar, byrngem ïakhih ki nongñiah trok

Jowai, Jylliew, 08: Ki ar tylli ki seng jong ki nongñiah trok ba kynthup ïa ka Meghalaya Commercial Truck Owner & Drivers Association (MCTODA) bad ka All Jaiñtia Cement & Clinker Transports Association (AJCCTA) ha ka sngi Saitjaiñ ki la byrngem ban pynlong da ka jingïakhih lada ki bor pynïaid jong ki karkhana pynmih dewbilat kiba don ha rilum Jaiñtia kim pyntreikam satia katkum ka dor ba la pynmih hukum da ka sorkar ha u snem 2021.
U President jong ka All Jaiñtia Cement & Clinker Transports Association (AJCCTA) Bah BalenThubru ha ka jingïakren bad ki lad pathai khubor ong, “naduh u snem 2021 ka Sorkar ka ladep ban pynthymmai ïa ka dor jong ka bai kit, hynrei ki trai kharkhana kim shym la pyntreikam bad ki la siew katba ki mon.”
U la kyntu ïa ka Sorkar Jylla ban kan ïatreilang ban pynbor ïa ki bor pynïaid kharkhana ban siew katkum ka dor ba ladep pynbeit.
Haba bynrap halor kane, u President jong ka MCTO&DA, Jaiñtia Unit, Bah Heibormi Pariat u la ong ba kane ka mat jingdawa kan dang ïai bteng tad haduh ban da ïoh ïa ka hok.
Ha ka jingïalang kaba la long hapdeng ka MCTODA, Jaiñtia Unit bad ka AJC&CTA ki la shim ïa ka rai ban dawa pynbor ïa ki bor pynïaid jong ki kharkhana pynmih dewbilat da kaba yn khot ïakren ha ka 14 tarik mynta u bnai bad lada ki trai jong ki karkhana kim wan mih shakhmat ki ar seng kin pynlong da ka jingïakhih.
U Bah Thubru u la pyntip ruh katba ka jingïakhih pyrshah ïa ki bor pynïaid jong ki karkhana dewbilat ka dang ïaid shakhmat hapoh ka lama jong ka Joint Action Committee (JAC) jong ki saw tylli ki seng, hynrei ki ar tylli ki kynhun ba kynthup ïa ka JHTOA bad ka EJHTOTA ki la mih noh napoh ka JAC.
U la ong ba u Chairman ka JAC uba dei u President ka JHTOA ha ka por ba dang ïakhih u la shim syndon ïa ka rai ban ïehnoh ïa ka kam nongïalam. U la ong sa kawei ka kynhun ka East Jaiñtia Hills Truck Owners and Transporters Association (EJHTOTA) lyngba u President kaba la ïasoi lang ïa ka shithi jingdawa hynrei kane ruh ka kynhun ka la pyntip ba kam kwah shuh ban ïatreilang bad ka JAC.
Halor kane, u Bah Thubru u la pynrem jur ïa kane ka jingleh jong kine ki ar tylli ki kynhun da kaba kynnoh ba ka lah ban don kaei kaei kaba sha lyndet bad u la kyntu ïa ki paidbah ba kin long kiba husiar kum ïa kine ki nongïalam kiba lah ban ïalam bakla ïa ki trai bad nongñiah trok.
Ha ka jingïakhih kaba la pynlong ha ka 22 tarik, Ïaiong, 2025 pyrshah ïa ki kharkhana pynmih dewbilat, u Bah Thubru u la ong ba u Deputy Commissioner jong ka East Jaiñtia Hills u la khot ïakren ïa ka JAC ban pynbeit ïa ka dor bai kali na Lumshnong sha Assam ha ka dor T. 1500 shi ton hynrei na ka liang u DC u la pyntip ba donkam shwa ka jingïakren markhmat bad ki trai kharkhana shwa ban shim ïa kane ka rai.
U Chief Adviser jong ka MCTODA u Bah S. Kyndiah ula bynrap, ‘ngi ladep ban thaw ïa ka JAC ba kynthup ïa ka MCTODA, AJCCTA, JHTOA bad EJHTOTA, hynrei kaba sngewsih ki ar tylli ki seng ki la weng noh.”
U la kyrtu ïa ki trai bad ki nongñiah trok ba kin ïatreilang bad lada ka jingdawa kam urlong kim banse ban pynlong da ki jingïakhih kiba kham tyngeh.