Shillong, Nailur 14 : Ka jingleit ontep donburom ïa ka met jong u Myntri Rangbah ba rim ka jylla u Dr D.D Lapang kan long lashai ka sngi 15 tarik Nailur 2025 ha kaba ka jinglehniam ha ïing kan sdang ha ka por 10 baje mynstep. Hadien kane yn rah ïa ka synduk ban pyndep ïa ka jingleh pyndon burom da ka sorkar jylla ha madan Student ha ka por 1 baje mynsngi nangta yn rah ïa ka synduk jongi ban pyndep donburom khatduh ha u Lum Jingtep ka Balang Jaiaw Presbyterian ha Jaiaw Weiking. I la dap 96 snem ka rta namar la kha ïa i ha ka 10 tarik Iaiong 1929.
Lah ban pynkynmaw ba u Dr D.D Lapang u la long u Myntri Rangbah ka jylla haduh san sien kynthih. U La mihkhmat ïa ka Nongpoh haduh 8 sien lynter kata naduh u snem 1972 bad u la shah rem tang shisien kata ha u 1993.
U Dei u khun phrangsngi jong i bah Donwa War bad kong Elsibon Lapang kiba la khlad noh na kane ka pyrthei. U Dr Lapang u la duh ïa u kpa mynba u dang dap 5 snem ka rta. U pule ha ka skul Primary Nongjri bad ynda la wai na skul u ju leit sha lum ban sharai masi ryngkat ki para khynnah jongka shnong Nongjri.
Hadien ba la pyndep ïa ka Class II u Rev Sorin Mallai u la wan ban pan na i kmie jongu Dr Lapang ban ïalam noh ïa u sha ka shnong Umroi ba un ïoh leit skul thikna.Ha kaba nyngkong i kmie i la sngeweh ban phah namar u dei u khun ba nyngkong uba la kham heh ruh napdeng ki lai ngut ki para shynrang bad i kmie i la ïoh jingmyntoi bha lyngba jongu namar u ju ïarap ha ki kam ïing kam sem. Ym tang ba u ap masi hynrei u rep ruh sha ki lyngkha kba bad ïarap ruh ha dukan die sha namar i kmie i ju die sha man la ka sngi ïew Umsning bad ïew Nongpoh. Na Umsning sha nongpoh ki ju leit ïew da ka kali kulai bad ki ju ïamih ha ka por 2 baje mynstep bad poi 5 baje mynstep ban ïoh plie dukan. U Dr Lapang u ju ïarap ïa i kmie ha baroh ki jait kam ba i trei bad u dei uba trei shitom bha naduh ba dang khynnah.
Hadien ba i kmie i la pyrkhat bha i la rai ban phah noh ïa un ban phah shong noh bad u Rev S Mallai sha Umroi khnang ba un ïoh shong skul thikna.
Ha ïing u Rev Mallai u Dr Lapang u ju ïarap bad trei baroh ki jait kam kiba shah hakhmat bad ka leit skul artad. Ynda haba la kut shisnem la ïalam noh ïa u Dr Lapang sha u Head Master ka Mawkhar Christian High School uba dei u Tymmen Basan ka Balang Presbyterian Mawkhar u W.Read . Haba u head master u la shim ban exsamin ïa ki khynnah ban pynrung Class IV u Dr Lapang u la wan ba nyngkong eh napdeng kiba ïaleh bad u la ïoh ban rung klass.
Ynda u la dep ïa ka Class VI i kmie i la ong ba im lah bor shuh ban phah skul namar i donkam ïa ka jingkyrshan lem jongu ïa ka ïing ka sem namar ka jingduk ka jingkyrduh.U Head Master uba ju khot u babu Will ha kapor ba long ka jingïaseng jongka Presbytery Shillong Ri Bhoi ha Raitong u la ïaid na ka shnong Nongjri bad rung ha ka ïing i kmie u Dr Lapang. U Babu Will u la kren ïa i kmie ba im dei ban pynpep skul ïa u Dr Lapang namar u la ong “ Nga ïohi ba ka don ka dak jingkyrmen ha une u khynah” U Babu Will u la kular ruh ban ym shim baiskul shuh na u, un shah ba un sah noh ha ka kamra ba shapoh jongka skul bad ban khmih bad pyndonkam bha ïa u. Halor kine ki jingkular u babu Will i kme i la kohngh bad phah skul biang ïa u Dr Lapang. U Rev Sorin u la ïarap ban pynïoh scholarship 5 tyngka shibnai na ka Fund Kmie ka Lani na ka liang jongka Presbytery bad u Syiem ka Hima Myllem u la ai bai bam 8 tyngka shibnai.
I Kmie jongu Dr Lapang im lah shuh ban kyrshan ba un pyndep ïa ka Matrik. Kumta u Dr Lapang u la sangeh noh ka jingpule bad rung noh ha ka Basic Training School, Malki kum u Nonghikai hapoh jong i kong Helen ka Principal . Hadien ba la dep ka Training u la leit ban hikai ha Saiden Basic School, Nongpoh bad dei nangne u la ïaleh private ïa ka Matrik bad u lapass bha.
(Yn dang bteng)
