SHILLONG, Naiwieng 21: Mynta ka sngi ka lympung First Division Football League 2025 jong ka Shillong Sports Association, kan sakhi ïa ka jingïakhun kaba khatduh jong ka samoi ka ban rai ïa ka burom lahduh hapdeng ka Nongkseh SC bad ka Meghalaya Police.
Kane ka jingïalehkai kan sdang ha ka por 4:15 baje janmiet ha madan First Ground-SSA Stadium, Polo.
Baroh ar tylli ki kynhun ki la bteng ïa ka jingjop ba paka (100%) ha kane ka samoi da kaba jop ïa baroh 8 tylli ki jingïalehkai ba ladep kaba la pynlong ïa ki ban synshar naduh ba sdang ïa ka thup kyrdan Top-2 ha ka miej. Baroh ar ki la kamai 24 poiñ, hynrei ka Nongkseh ka ïoh ban lamkhmat ha khlieh duh jong ka miej namar ka don ïa ka jingïapher kol (goal difference) kaba kham bha, da 38 la 24 haba ïanujor bad ka MLP FT.
Kumta ka MLP ka donkam ban jop khnang ban ïohrah ïa ka nam lahduh, katba ka Nongkseh ka donkam tang ïa ka jingïakhaid ban pynthikna ïa ka burom lahduh. Hynrei watla katta ruh, baroh ar liang kin khmihlynti ban pynjlan ïa ka jingjop kaba paka sha ka 9 sien lynter shuwa ba kin kiew kyrdan sha ka lympung Shillong Premier League ha ka samoi ban wan.
Ka resol jong kane ka jingïalehkai kan pynthikna ruh ïa ka jingpynïakap kynhun ha ka SSA Champions Cup ka ban wan, namar ka lahduh jong ka First Division kan rung ha ka Group B, katba kaba wan ba-ar kan shah thup ha ka Group A.
Kumban shu kdew hangne, ki ar tylli ki kynhun ki ban shah pynhiar kyrdan sha ka Second Division ki long ka Lawsohtun SC bad ka Nongrah SC, kiba pyndep sha trai duh jong ka miej da tang mar 5 poiñ na ki 9 tylli ki jingïakhun.
