Shillong, Risaw 25: Ki klob ba khlaiñbor jong ka Meghalaya na kylleng ki jaka ki la pynkhreh bha ïalade ban ïakhun ïa ka lympung ïalehkai kaba heh tam jong ki klob ha ka jylla baroh kawei ha kaba yn plie pyrda ïa ka Meghalaya State League kaba saw (4th MSL) 2024 ha kane ka sngi Saitjaiñ, 26 tarik Risaw.
Ha kane ka jingïakhun plie pyrda yn sakhi ïa ar tylli ki lahduh barim – ka lahduh ba nyngkong ka 7 Wasa United bad ka Shillong Lajong, ka lahduh ha u snem 2019 – kin ïoh ïa ka kabu ban sdang pynïaid shakhmat ïa kane ka lympung ha Wahiajer Multi Sports Complex ha Wahiajer, West Jaiñtia Hills. Ia kane ka jingplie pyrda ha ka por 1baje nohphai sngi yn sa pynkup burom da u Symbud Myntri Rangbah ka Jylla – Sniawbhalang Dhar.
Kane ka lympung, kaba la pynïaid da ka Meghalaya Football Association bad la kyrshan pura da ka tnad Sports and Youth Affairs jong ka Sorkar Meghalaya, ka wanrah lang ïa ki klob kiba kynsai tam na ki lympung jong ki synjuk distrik (local league) kiba la ïasoh lang kum kawei ban don bynta ha kane ka lympung kaba heh tam jong ka jylla.
Ka Rangdajied United FC ka dei ka kynhun ka ban ïada ïa ka burom, hadien ba ka la pynliem ïa ka Khliehmawlieh Youth Club ha ka final jong u snem ba la dep bad long ka kynhun kaba lai ban rah ïa kane ka khusnam kum ka lahduh.
Ha kane ka samoi ka don ka jingkylla ha ka rukom ïalehkai, ha kaba ka jingdon jong ki Group ka la roi sha ki hynriew tylli, ha kaba la pynïakap mar saw tylli ki kynhun ha kawei pa kawei ka Group. Ka lympung kan long kaba itynnat hadien ba la ïoh ban pynrung ruh ïa ka wat ïakhun Quarter final.
Ki kynhun ba kynsai tam na kawei pa kawei ka Group ryngkat bad ar tylli ki kynhun ba bat kyrdan ba ar kiba kham tbit kin ïoh ban bteng ïa ka lynti ïaid sha ka wat ïakhun knockout.
Ka Wahiajer kan pynlong ïa ki jingialehkai jong ka Group E bad kane ka dei ka sien kaba nyngkong ba ïa kane ka madan thymmai ba la bei pisa da ka sorkar jylla yn pyndonkam na ka bynta ka lympung MSL.
Kiwei pat ki jaka ki long ha Tyrsad, ka thaiñ kaba la bnanam ïa ka jingdon jong ki nongkyrshan ba shitrhem, katba ka Tura, Shillong, Mawkyrwat bad Khliehriat kin ïoh ban pynlong biang ïa ka lympung mynta ka samoi.
