Shillong, Ïaïong 07: Ka Nokrek Tigers bad ka Myntdu Lions mynta ka sngi Saitjaiñ kin mih madan ban ïaknieh ïa ka nam lahduh jong ka lympung ïalehkai Senior men Challengers Cup 2022 ba pynïaid da ka Meghalaya Cricket Association (MCA).
Kine ki ar tylli ki team kin ïaknieh nam lahduh ïa kaba yn sa sakhi lang da u Mohammad Azharuddin, uba dei u kapten barim ka kynhun ïalehkai cricket ka ri India bad uba bat ruh kum u President jong ka Hyderabad Cricket Association uban long kum u Kongsan ha kane ka jingïakhun final.
Kiwei pat kiban don lang ha kane ka sngi ki kynthup ïa u Bah DP Wahlang IAS uba dei u Additional Chief Secretary, Bah HWT Syiem IAS, Chief Secretary ba la shongthait bad ruh u Secretary bad President barim ka North Eastern Council bad Shillong Cricket Association bad u Naba Bhattacharjee, u Honorary Secretary barim ka MCA bad Coordinator jong ka BCCI Task Force bad Advisor sha u Honourable Chief Minister.
Baroh ar kine ki kynhun (Tigers bad Lions) kila pyndep kila pyndep ïa ka jingïalehkai round robin ba 10 sngi bad khur mar 10 point hynrei ka Nokrek ka don ha ka kyrdan ba nyngkong na ka jingïapher ha ka run rate, katba ka Umiam Eagles, Simsang Sharks bad ka Symper Panthers ki khlem poi sha ka thup ki ar kynhun (top two), watla kila lah ban ïalehkai bha ha kane ka tournament.
Watla kala don ka jingshah pynhut ha ki bor ka mariang ha Nongbah Shillong ha kine ki ar taïew ba lah dep, ka sah satang kawei ka jingïalehkai kaba ym pat shym la lah ban pyndep kata ka long hapdeng ka Lions bad ka Tigers kaban long ha ka 28 tarik Ïaïong, hynrei ym pat lah ban batai kano ka kynhun kaban wan ha ka kyrdan kaba nyngkong.
Ha ka liang ka tied, ka Nokrek ka don saw ngut ki rangtied kiba kamai shiteng spah ron (half-century), kine ki kynthup ïa u Anish Charak u ïoh arsien, u Sylvester Mylliempdah (kapten), u Krishna Thapa bad u Rajesh Tati. Katba ka Myntdu ka don u rangkawang bol ba kynsai tam u Aryan Bora uba la khur 13 wicket.
Ka jingïakhun final hapdeng kine ki ar tylli ki team kan long kaba itynnad bha khamtam ba kin hap ban ïalehkai bad pyni ïa ka sap hakhmat u Azharuddin bad kumjuh ruh ba ka MCA shen kan sa sdang ban jied rangïalehkai na bynta ka samoi ïalehkai kaban wan.
Ka jingïalehkai kan sdang ha ka por 9 baje mynstep bad na ka liang ka MCA ka khot sngewbha ïa baroh kiba kwah ban wan peit ïa kane ka jingïakhun final.
